འཁྲབ་གཞས་དང་གར་འཆམ་ཟུང་འབྲེལ་སྦེ་ཨིན་མི་ ཤ་ཝ་ཤ་ཁྱིའི་འཆམ་འདིའི་བརྗོད་དོན་ ངོ་མ་ར་ རྣལ་འབྱོར་གྱི་དབང་ཕྱུག་རྗེ་བཙུན་མི་ལ་རས་པའི་ རྣམ་ཐར་རྒྱ་ཆེ་བ་གཏིང་ཟབ་པ་སྦེ་ཡོད་མི་ལས་ སློབ་མ་གཙོ་བོ་ཅིག་ཨིན་མི་ ཁྱི་ར་ཝ་མགོན་པོ་རྡོ་རྗེ་དེ་ གྲུབ་པ་ཐོབ་པའི་ལེའུ་ནང་ལུ་བཏོན་ཏེ་ འབྲུག་རྒྱལ་ཁབ་ཀྱི་སྔོན་བྱོན་རྒྱལ་བ་གོངམ་ཚུ་གིས་ མཛད་བཤུལ་འབྲུག་པའི་གར་འཆམ་མཐུན་མོང་མ་ཡིན་པ་ཅིག་ཨིན། འདི་ཡང་ ཧེ་མ་དུས་རབས་ ༡༡ པའི་ནང་ལུ་ གངས་ཅན་གྲུབ་པའི་དབང་ཕྱུག་ཆེན་པོ་ རྗེ་བཙུན་མི་ལ་རས་པ་ (༡༠༥༢-༡༡༣༥) མཆོག་ བལ་པོ་ (ནེ་པཱལ) དང་ བོད་ཀྱི་ས་མཚམས་ སྟེ་ཤང་གུར་ཏ་ཟེར་བའི་དབེན་པའི་རི་ཁྲོད་ལུ་ དག་པ་ས་གསུམ་གྱི་རྟོགས་པའི་ཡེ་ཤེས་མངོན་སུམ་དུ་གྱུར་ཚར་ཏེ་ གཞན་འདི་ཕར་བཞག་ ཐ་ན་ ཧ་ཅང་གིས་རྨོངས་པའི་དུད་འགྲོ་སེམས་ཅན་དེ་ཚུ་ལུ་ཡང་ དམ་པའི་ཆོས་ཀྱི་དོན་དག་ཚུ་ གོ་བརྡ་འཕྲོད་ཚུགས་པའི་རང་དབང་ཐོབ་སྟེ་བཞུགས་ནུག། ཚར་གཅིག་འབདཝ་ད་ དཔྱད་རིག་རྣམ་རྟོག་མེད་སི་སི་སྦེ་ སྒྲུབ་ཕུག་གི་འོག་ལས་ མི་སྐད་དང་ཁྱི་སྐད་ལྷང་ལྷང་ཅིག་གསན་ཏེ་ ག་ཅི་ཨིན་ན་ཟེར་ཐུགས་བཞེད་གནང་སྟེ་ བྱག་ཕུག་གི་འོག་ལས་མར་བྱོན་སྦེ་གཟིགསཔ་ད་ ཤཝ་དམརཔོ་ཅིག་ གནམ་མེད་ས་མེད་འུ་སྡུག་ཐང་ཆད་ གཟུགས་ཀྱི་སྤུ་ཕུད་རྡོག་རེ་ལས་ རྔུལ་ནག་རེ་འཐོན་ཏེ་འཇིགས་སྣང་དང་བཅསཔ་སྦེ་ལྷོད་ནུག། དེ་ལུ་ཐུགས་ཀྱི་བརྩེ་བ་ཆེན་པོའི་སྒོ་ལས་ དམ་པའི་ཆོས་ཀྱི་མགུར་མ་ཅིག་གསུངས་པ་ཙམ་གྱིས་ འཇིགས་སྐྲག་གི་སྣང་བ་ཚུ་རང་བཞིན་གྱིས་ཡལ་ཏེ་ བླམ་རྗེ་བཙུན་གྱི་གཡས་ཧོངས་ལུ་ སེམས་བག་ཕེབས་པའི་ངང་ལུ་སྡོད་ཚརཝ་ཅིག་ ཤ་ཁྱི་དམརཔོ་གཟུགས་གློག་འཁྱུག་དོ་བཟུམ། ཞེ་སྡང་མེ་འབར་དོ་བཟུམ་འབད་མི་ཅིག་ཡང་ རྟིང་བདའ་སྟེ་ལྷོད་ནུག། དེ་ལུ་ཡང་དམ་པའི་ཆོས་ཀྱི་མགུར་མ་ཅིག་གསུངསམ་ཅིག་ ཉོན་མོངས་པའི་གདུང་སེམས་ཞི་སྟེ་ བླམ་ རྗེ་བཙུན་གྱི་གཡོན་ཧོངས་ལུ་སྡོད་ནུག། ཤཝ་དང་ཤ་ཁྱི་གཉིས་ ཨའི་དང་བུ་བཟུམ་སྡོད་ཡོད་པའི་རྟིང་ཤུལ་བདའ་སྟེ་ ཤ་རོགསཔ་མགོན་པོ་རྡོ་རྗེ་ཟེར་མི་ གཉའ་རྒོད་འདྲོག་སི་སི་ཅིག་ ལག་པར་མདའ་གཞུ་འབག་སྟེ་འབད་ལྷོད་ནུག། ཁོ་གིས་ བླམ་རྗེ་བཙུན་གྱི་རྩ་བ་ལུ་ ཤཝ་ཤ་ཁྱི་དེ་ཚུ་མཐོངམ་ཅིག་ སྒོམ་ཆེན་དེ་གིས་ངེ་གི་ཤཝ་དང་ཤ་ཁྱི་གཉིས་ལུ་ ངན་སྔགས་ཅིག་བཏང་བཏངམ་ཨིན་པས་མནོ། ཞེ་སྡང་ལངས་ཏེ་ ཁྱོད་ཀྱིས་ངེ་གི་ཤཝ་དང་ཤ་ཁྱི་དེ་ སྐྱབས་འབད་ཚུགས་དོ་བཟུམ་ ངེ་གི་མདའ་འདི་ཡང་ ཁྱོད་ཀྱིས་ག་དེ་སྦེ་སྐྱབས་འབད་ཚུགས་ག་བལྟ་གེ་རྨ་རེད་ཟེར་ དུག་མདའ་མ་གསང་སྒྲོ་ལྔམ་དེ་ ཐེ་ཚོམ་མེད་པར་རྐྱབ་བྱིན་པའི་སྐབས་ མདའ་དེ་བླ་མའི་སྐུ་གཟུགས་ལུ་ཕོག་ནི་ཕར་བཞག་ མདའ་གཞུ་དེ་ཡང་ དུམ་ད་ཁེམ་སྦེ་ཆག་ཡར་སོང་ནུག། ཁོ་ག་ཅི་ཨིན་ན་མནོ་སྟེ་ སེམས་ཐེ་ཚོམ་ཟ་སྡོད་པའི་བར་ན་ བླམ་རྗེ་བཙུན་རིན་པོ་ཆེ་གིས་ ཁྱོད་ཀྱིས་མདའ་འདི་ནམ་ཡང་རྐྱབ་ལོང་འོང་། ད་ལྟོ་ ཧེ་མ་ངེ་གི་གླུ་འདི་ལུ་ཚར་གཅིག་ཉན་ད་ཟེར་ དམ་པའི་ཆོས་ཀྱི་མགུར་མ་ཅིག་གསུངས་ཁོ་རའི་གནངམ་ད་ སྔོན་མ་ལཱ་ངན་འབད་མི་འདི་ལུ་ འགྱོད་པ་དྲག་པོ་སྐྱེས་ཏེ་ བཤགས་པ་ཕུལ་སྦེ་ ད་ལས་ཕར་བཀའ་ག་གནང་དང་ གསུང་ཅི་སྒྲུབ་ཀྱི་ཕྱག་ཕྱིད་ཞུ་ནི་གི་ཁས་བླངས་དམ་བཅའ་ཕུལ་ཏེ་ སྒྲུབ་པ་ ཉམས་ལེན་འབདཝ་ལས་ ཚེ་གཅིག་ལུས་གཅིག་ལུ་ ཁྱི་རྭ་མགོན་པོ་རྡོ་རྗེ་ཟེར་ སངས་རྒྱས་སོང་པའི་གྲུབ་ཐོབ་སྦོམ་ཅིག་བྱུང་བྱུངམ་གི་རྣམ་ཐར་འདི་ གར་འཆམ་མཐོང་གྲོལ་གྱི་ཚུལ་སྦེ་མཛད་གནང་གནངམ་ཨིན་པས། གར་འཆམ་འདི་ དོན་གྱི་སྙིང་པོ་ལུ་ གཙོ་བོ་དང་འཁོར་ག་ར་ རྫོགས་པའི་སངས་རྒྱས་དང་བྱང་ཆུབ་སེམས་དཔའ། ས་བཅུའི་དབང་ཕྱུག་ཆེན་པོ་ཙང་ཙ་གི་མཛད་པ་ཨིནམ་ལས་བརྟེན་ བྱིན་རླབས་དང་ཕན་ཡོན་སྦོམ་ཡོདཔ་ཨིན་ཟེར་ ཉེར་མཁོའི་བུམ་བཟང་ནང་ལས་ཐོན་དོ་བཟུམ་ མཛད་པ་ཚུ་ལུ་ ནམ་རང་འབད་རུང་དག་སྣང་བསྐྱེད་དགོཔ་ཨིན། ང་བཅས་རའི་ཁ་རྒྱུན་ལུ་ པད་གླིང་གིང་གསུམ་གྱི་སྤུས་དག་ཤོས་ ཀྲོང་གསར་མནའ་སྦིས་དང་སྐོར་ཕུག་གི་སྒྲུབ་ལུ་གཞི་བཞག་ནི་དང་ དེ་བཟུམ་སྦེ་ རཀྴ་དམང་འཆམ་འདི་ཀྲོང་གསར་རྫོང་གི་ཚེས་བཅུ། དེ་ལས་ ཤཝ་ཤ་ཁྱིའི་གར་འཆམ་འདི་ དར་དཀར་བཀྲི་ཤིས་གཡང་རྩེ་རྫོང་གི་ ཚེས་བཅུ་ལུ་གཞི་བཞག་དགོཔ་སྦེ་ སློབ་སྲོལ་ཡོདཔ་ཨིན།

རང་ལུགས་བཞེས་སྒོའི་སྐོར་ལས་ ལམ་སྟོན་གྱི་དཔེ་དེབ་ཅིག་རྩོམ་སྒྲིག་འབད་དགོས་པའི་ ཁུངས་དོན་འདི་ཡང་ རྒྱལ་ཁབ་ཡར་རྒྱས་གོང་འཕེལ་འགྱོཝ་དང་བསྟུན་ཏེ་ རྫོང་ཁག་ ༢༠ འི་གཡུས་སྒོ་སོ་སོའི་ནང་ རང་ལུགས་བཞེས་སྒོ་བཟོ་ཐངས་མ་འདྲཝ་ཚུ་ རང་བཞིན་གྱིས་ཉམས་འགྱོ་བའི་དུས་ཚོད་ཁར་ལྷོད་ཡོདཔ་ལས་ སྲོལ་འཛིན་སྒྲིག་ལམ་སྡེ་ཚན་གྱིས་འགོ་འདྲེན་ཐོག་ལས་ རང་ལུགས་བཞེས་སྒོ་བཟོ་ཐངས་དང་ རྫས་སྦྱོར་བླུགས་ཐངས་ཚུ་མ་ཉམས་པར་བཞག་ཐབས་ལུ་ འབྲུག་གི་བཞེས་སྒོའི་ ཀི་དེབ་གཅིག་རྩོམ་བསྒྲིགས་འབད་མི་འདི་གིས་ རྒྱལ་བ་གོང་མ་དང་ ཕ་མ་རྒན་རབ་རྣམས་ཀྱི་བཞེས་སྲོལ་ཡོད་མི་བཞེས་སྒོའི་རིགས་ འཛིན་སྐྱོང་སྤེལ་གསུམ་ལུ་ ཕན་ཐོགས་འབྱུང་ཚུགས་པའི་རེ་བ་ལུ་དམིགས་ཏེ་ བཟོ་ཐངས་ཀྱི་ལམ་སྟོན་ཚུ་ པར་དང་སྦྲགས་ཏེ་བཀོད་ཡོདཔ་ལས་ འདི་ནང་ སློབ་གངས་དཀར་དབང་འདུས་མཆོག་གིས་ རྒྱབ་བསྐྱོར་གང་ དྲག་མཛད་གནང་མི་དེ་ལུ་ བཀའ་དྲིན་དགའ་ཚོར་ཞུ་ནི་དང་ ཀི་དེབ་འདི་གིས་སྤྱིར་འབྲུག་མི་ཚུ་ལུ་ བཞེས་སྒོ་བཟོ་ནི་དང་ བཟའ་ནི་ལུ་ དང་འདོད་བསྐྱེད་ནི་དང་ ལྷག་པར་དུ་ འབྲུག་མི་ན་གཞོན་ཚུ་ལུ་ ཕན་ཐོགས་ཚུགས་པའི་རེ་སྨོན་ཨིན།