མ་ཁུར་བཟོ་ནི་འདི་ བུམ་ཐང་རྫོང་ཁག་ སྟང་རྒེད་འོག་ནང་རྐྱངམ་གཅིག་མ་གཏོགས་ རྫོང་ཁག་དང་རྒེད་འོག་གཞན་ཁར་བཟོ་ནི་གི་སྲོལ་མེད་པའི་ཁར་ དེའི་ནང་དོན་ཉིད་ལས་ སྟང་རྒེད་འོག་ ཨྱོན་ཆོས་གླིང་གཡུས་ཚན་འདི་ནང་ མི་རབས་ལས་མི་རབས་བརྒྱུད་དེ་ གདོང་ཆང་དྲང་པའི་སྐབས་ སྤྲོ་སྟོན་གྱི་ཟས་རྡིག་ཤོས་ཅིག་སྦེ་ ལག་ལེན་འཐབ་སྟེ་འདུག། ལོ་ཐོག་ཀར་ལས་བཟོ་བའི་ལེ་དོ་འདི་ དུས་རྒྱུན་གྱི་བཞེས་སྒོ་སྦེ་ཟ་སྲོལ་མེད་རུང་ གཡུས་སྒོ་ནང་ ཕྱི་ལས་མགྱོནམོ་ བླམ་དང་དཔོན་ཁག་གཙོ་ཅན་ཚུ་བྱོན་པའི་སྐབས་ལུ་ གདོང་ཆང་དང་གཅིག་ཁར་ གཡུས་ཁའི་ཟས་གཙོ་ཅན་ཅིག་ཨིན་པའི་ཁུངས་སྦེ་ དུས་ཚོད་བཏོན་ཏེ་ར་བཟོ་ཞིནམ་ལས་ ཨིན་ཅི་མིན་ཅི་དྲངསམ་ཨིན་མས། དེ་མ་ཚད་ ལོ་གསར་དང་དུས་སྟོན་ ཚེས་བཅུ་དང་ཚོགས་འཁོར་ཚུ་གི་སྐབས་ལུ་ཡང་ བཟོ་ནི་ཡོད་པའི་ཁར་ མི་ཤིའི་སྐབས་ལུ་ཡང་ ཟས་བསྔོའི་གྲངས་སུ་ངེས་པར་དུ་བཟོ་སྟེ་བཀལཝ་ཨིན་མས། ཨིན་རུང་ དེའི་སྐབས་ ཇ་ཙམ་དང་ཟ་ནིའི་ཟས་སྦེ་དྲང་སྲོལ་མེདཔ་ཨིན་མས། ང་བཅས་རའི་རྒྱལ་ཁབ་ཀྱི་རྫོང་ཁག་ ཉི་ཤུའི་ནང་ ས་གནས་ཀྱི་ཆགས་ཚུལ་དང་ ས་ཁ་མཐོ་དམའ་ དེ་ལས་ཚ་དྲོད་དང་བསྟུན་ཏེ་ ལོ་ཐོག་ཚུ་བཏབ་ནི་དང་བསྡུ་ནིའི་དུས་ཚོད་ཚུ་ཡང་ སོ་སོར་སྦེ་འོངམ་ཨིན། ད་རེས་ཞིབ་འཚོལ་འབད་སའི་ས་གནས་ བུམ་ཐང་རྫོང་ཁག་ སྟང་རྒེད་འོག་ ཨྱོན་ཆོས་གླིང་གཡུས་ཚན་ནང་ ཀར་འདི་རང་ཟླ ༨ པའི་ཟླ་མཇུག་ཁམས་ལུ་བཏབ་སྟེ་ རང་ཟླ་ ༦ པ་དང་ ༧ པའི་ནང་བསྡུཝ་ཨིན་མས།

སྦོ་ཡོ་མཛརཝ་ ཟེར་མི་འདི་ ཆུམ་གྱི་རིགས་མ་འདྲཝ་ཚུ་ བརྔོ་བའི་སྐབས་ སྦོ་ཏེ་སྐྱ་སི་སི་སྦེ་ཡོད་མི་ཅིག་ལུ་སླབ་ཨིན། སྦོ་ཡོ་ཟེར་མི་འདི་ གཞུང་བརྔོ་མཛརཝ་དང་ཕྱདཔ་ད་ སྦོ་ཏེ་ཡོད་ནི་འདི་གིས་ སྦོ་ཡོ་ཟེར་དུས་དང་ཕུ་ལས་ར་ དར་ཏེ་ཡོད་པའི་ཐ་སྙད་ཅིག་ཨིན་ཟེར་ཁ་རྒྱུན་སྦེ་བཤད་ནི་འདུག། སྦོ་ཡོ་མཛརཝ་འདི་ ལོ་བསྟར་གྱི་ཆོ་གུ་སྐབས་ལུ་དང་ ལོ་གསར་ཉི་ལོག་ཚུ་གི་སྐབས་ལུ་ ཇ་རྩམ་མེད་ཐབས་མེདཔ་ཅིག་ཨིན་པའི་ཁར་ མཛརཝ་ལྷམ་པ་མ་འདྲཝ་ཚུ་ ཚོགས་རྫས་སྦེ་ཡང་སྒྲིག་སྲོལ་ཡོདཔ་ཨིན། མཛརཝ་འདི་ མར་དང་གཅིག་ཁར་སྒྱེས་ཏེ་ མཛརཝ་མར་སྒྱེས་ཟེར་ ཇ་རྩམ་གྱི་ལྷམ་པ་བསྒྲིགས་ཡོད་པའི་གྲས་ལས་ ཇ་རྩམ་རྡིག་ཤོས་ཅིག་སྦེ་རྩིཝ་མ་ཚད་ སྤྱིར་བཏང་ གྲོང་གསེབ་གཡུས་སྒོ་ཚུ་ནང་ མེད་ཐབས་མེདཔ་ཅིག་སྦེ་བརྩིཝ་ཨིན། འདི་ཡང་ ཁྱིམ་ནང་ ནང་གི་ཨ་མའི་ལག་ཤུལ་བདེ་ནིའི་དོན་ལུ་ མཛརཝ་འདི་ དུས་ཨ་རྟགས་ར་ མ་ཆད་པར་བཞག་ཞིནམ་ལས་ ཁྱིམ་ནང་ མགྱོནམོ་དྲག་ཞན་ཆེ་ཆུང་ག་བཟུམ་ཅིག་འོང་རུང་ བསུ་བ་ ཇ་དང་མཛརཝ་ ཡང་ན་ ཆང་གིས་འབདཝ་ཨིན་མས།

དང་ཕུ་ ཕམ་ཚུ་སྡོད་གངས་རི་ནགས་དང་སྤང་གསུམ་ནང་ལུ་སྡོདཔ་ད་ མི་ཚེ་འཚོ་བ་སྐྱོང་ཐབས་ལུ་ འབྲས་ཤིང་རྐྱངམ་གཅིག་ལུ་བརྟེན་ཏེ་མེན་པར་ སེམས་ཅན་ཚུ་བསད་དེ་གཟུགས་ཁར་ཕན་ནུས་ཡོད་པའི་ ཤ་ཁྲག་གི་རིགས་ཚུ་སྤྱོད་དེ་ རིམ་གྱིས་ མཐའ་སྐྱོང་འཐབ་བཏུབ་དང་འགྲོ་བ་མི་དང་འབྲེལ་བ་འཐབ་བཏུབ་པའི་སེམས་ཅན་ཚུ་ངོས་འཛིན་འབད། གཡོག་ཚུ་བཀོལ་ཏེ་ སོ་ནམ་ཞིང་ལཱ་འབད་ནི་ཚུ་གིས་མ་ཚད་པར་ དེའི་འཐོན་སྐྱེད་ཚུ་ག་ར་སྤྱོད་དེ་ མི་དང་སེམས་ཅན་གཉིས་གཅིག་གིས་གཅིག་ལུ་ རྟེན་བྱུང་གི་ཆོས་ཅིག་ལུ་གྱུར་ཏེ་འདུག། འབྲུག་རྒྱལ་ཁབ་ནང་ཨིན་པ་ཅིན་ གངས་ལྗོངས་ཧི་ལ་ཡའི་རི་སུལ་ཚུ་ནང་ གཞི་ཆགས་པའི་འགྲོ་བ་མི་ཅིག་འབདཝ་ལས་བརྟེན་ དེ་ནང་ལུ་ རྩྭ་ཆུ་འཛོམས་པའི་རྐྱེན་གྱིས་ མི་དང་སྒོ་ནོར་སེམས་ཅན་ནོར་དང་རྟ། ཕགཔ་དང་བྱ། དེ་ལས་ ར་དང་ལུག་ཚུ་འཚོ་སྐྱོང་འཐབ་སྟེ་ མི་ཚེ་འཚོ་བ་སྐྱོང་ནི་དང་ འགྲོ་འགྲུལ་འཐབ་ནི་ཚུ་ལུ་ བཀོལ་སྤྱོད་འབད་དེ་ཡོདཔ་ཨིན། བཀོལ་སྤྱོད་འབད་ཐངས་ཀྱི་ནང་ལས་ ནོར་ཚུ་ན་འཐདན་མི་དང་འབྲེལ་བ་ཡོདཔ་ལས་ འབྲུག་མི་ཚུ་གིས་ནོར་མ་གསོ་མི་དང་ ནོར་ཁྲལ་མ་འབག་མི་དང་ཕུ་ཆེནམོ་ཅིག་མིན་འདུག། ནོར་ཚུ་གསོན་པོ་སྦེ་སྡོད་པའི་རིང་ལུ་ ཨོམ་གྱི་འཐོན་སྐྱེད་དང་ གླང་གིས་ཞིང་ལཱ་ཚུ་དུས་ཚོད་དང་བསྟུན་ཏེ་འབད་ནི་ལུ་གྲོགས་རམ་འབདཝ་མ་ཚད་ ཤི་ཞིནམ་ལས་དེའི་ཤ་དང་ཁྲག དེ་ལས་ པགས་ཀོ་ཚུ་ ག་ནི་ཡང་ཆུད་ཟད་མ་གཏང་པར་ བཀོལ་བཏུབ་མི་རིགས་ཚུ་མཁོ་བའི་ལག་ཆས་ཚུ་བཟོ་ནི་དང་ དེ་ལས་གཞན་མི་ཚུ་ ཟས་སྦེ་ལོངས་སྤྱོདཔ་ཨིན། འཕྲལ་འཕྲལ་སྐབས་ བཞེས་སྒོ་བཟོ་ནིའི་དོན་ལུ་དམིགས་བསལ་སྦེ་ ནོར་གྱི་པགས་ཀོ་སྐམ་བཞག་མི་ཚུ་ མེ་གཏང་སྟེ་ ཚོདམ་སྦེ་བཟོ་མི་ཀོཝ་གི་སྐོར་ལས་ ཞིབ་འཚོལ་འབད་དེ་ པགས་ཀོ་སྐམ་ཐངས། མེ་གཏང་ཐངས། སྤུ་ཀྲེག་ཐངས། དེ་ལས་ཚོདམ་མ་འདྲཝ་ག་དེ་སྦེ་ར་བཟོ་སྲོལ་ཡོདཔ་ཨིན་ནའི་སྐོར་ལས་ ཧེ་མ་བྲིས་ཏེ་ཡོད་པའི་དཔེ་དེབ་ཚུ་ལུ་ དབྱེ་དཔྱད་འབད་དེ་རྒྱབ་ཁུངས་བཅོལ། དེ་གུར་ གཡུས་མི་རྒས་ཤོས་ཚུ་དང་འདྲིས་གཏུགས་འབད་དེ་ འབྲུག་པའི་བཞེས་ཉམས་སྲུང་དང་དར་ཁྱབ་ཀྱི་དོན་ལུ་ བསྡུ་སྒྲིག་འབད་ནིའི་རྩིས་རྐྱབ་ཨིན། ནོར་རྒས་གཞོན་གྱི་པགས་ཀོ་གིས་ མི་ཚུ་ལུ་སོ་ནམ་ཞིང་ལཱ་དང་འབྲེལ་བའི་དུས་རྒྱུན་མཁོ་བའི་ལག་ཆས་ ལེ་ཤ་ཅིག་བཟོ་སྟེ་ལག་ལེན་འཐབ་སྲོལ་ཡོད་དོ་བཟུམ་སྦེ་ བཞེས་སྒོ་སྦེ་བཟོ་ནིའི་དོན་ལུ་ཡང་ ནོར་རྒས་གཞོན་གྱི་ཀོཝ་ལུ་གདམ་ཁ་རྐྱབ་སྲོལ་ཡོདཔ་ཨིན། སྒོ་ནོར་གྱི་རིགས་ལས་ ས་ཁ་མཐོ་སའི་འབྱོགཔ་ཚུ་གིས་འབད་བ་ཅིན་ གཡག་གི་པགས་ཀོ་ཚུ་ཨིནམ་དང་ དེ་ལས་ ས་དམར་སར་སྡོད་མི་དང་མཐའ་ནོར་གསོ་མི་ཚུ་གིས་ བ་དང་གླང་། བའུ་ཅུང་ཚུ་གི་པགས་ཀོ་ཚུ་མ་གཏོགས་ སྒོ་ནོར་སེམས་ཅན་གཞན་གྱི་པགས་ཀོ་དཔེར་ན་ ར་དང་ལུག་བཟུམ་གྱིས་མཆོད་ཆ་དང་སྙན་ཆའི་རིགས་བཟོ་ནི་དང་ གདན་སྦེ་ལག་ལེན་འཐབ་ནི། དེ་ལས་གཞན་ རྟ་བཟུམ་གྱི་ཤ་དང་པགས་ཀོ་གཉིས་ཆ་ར་ ལོངས་སྤྱོད་སྲོལ་མེདཔ་ཨིན། ལ་ནོར་དང་མཐའ་ནོར་གྱི་ཀོཝ་དང་ རྒས་གཞོན་གྱི་ཀོཝ་གཉིས་ངོས་བཟུང་ནི་ཡང་ ལ་ནོར་གཡག་གི་པགས་ཚུ་འབད་བ་ཅིན་ རྒྱ་སྟུག་སུ་མཚམས་དང་ ཚོདམ་བཙོ་བའི་སྐབས་ཡང་ སྟུག་ཚད་སྦོམ་དང་ཀོཝ་ལས་འཐོན་པའི་ཞག་ཡང་ གར་དྲགས་སྦེ་ཐོན་སྲོལ་ཡོདཔ་དང་ མཐའ་ནོར་གྱི་ཀོཝ་འདི་ སྟུག་ཚད་གཡག་གི་བཟུམ་ཅིག་མེད་པའི་ཁར་ ཞག་ཡང་ནེ་ཅིག་མི་ཐོནམ་མ་ཚད་ ཞིམ་ཧིང་གི་ཐད་ཡང་ལ་ནོར་གྱི་ཀོཝ་ར་དྲགཔ་ཨིན། ཀོཝ་ལུ་བལྟ་སྟེ་ ནོར་རྒས་གཞོན་གྱི་ཁྱད་པར་ཡང་ ཀོཝ་གི་སྟུག་ཚད། སྤུ་དང་འཚོག་ཧིང་གི་དུས་ཚོད་ཚུ་ལུ་བལྟ་སྟེ་ འཇམ་ཏོག་ཏོ་སྦེ་ཤེས་ཚུགསཔ་ཨིན།

ལེ་དོ་བཟོ་ནི་འདི་ བུམ་ཐང་རྫོང་ཁག་ སྟང་རྒེད་འོག་ནང་རྐྱངམ་གཅིག་མ་གཏོགས་ རྫོང་ཁག་དང་རྒེད་འོག་གཞན་ཁར་བཟོ་ནི་གི་སྲོལ་མེད་པའི་ཁར་ དེའི་ནང་དོན་ཉིད་ལས་ སྟང་རྒེད་འོག་ ཨྱོན་ཆོས་གླིང་གཡུས་ཚན་འདི་ནང་ མི་རབས་ལས་མི་རབས་བརྒྱུད་དེ་ གདོང་ཆང་དྲང་པའི་སྐབས་ སྤྲོ་སྟོན་གྱི་ཟས་རྡིག་ཤོས་ཅིག་སྦེ་ལག་ལེན་འཐབ་སྟེ་འདུག། ལོ་ཐོག་ཀར་ལས་བཟོ་བའི་ལེ་དོ་འདི་ དུས་རྒྱུན་གྱི་བཞེས་སྒོ་སྦེ་ཟ་སྲོལ་མེད་རུང་ གཡུས་སྒོ་ནང་ཕྱི་ལས་སྐུ་མགྲོན་ བླམ་དང་དཔོན་ཁག་གཙོ་ཅན་ཚུ་བྱོན་པའི་སྐབས་ལུ་ གདོང་ཆང་དང་གཅིག་ཁར་དྲངས་ནིའི་དོན་ལུ་ དུས་ཚོད་ལོགས་སུ་སྦེ་བཏོན་ཏེ་བཟོ་སྲོལ་ཡོད་པའི་ གཡུས་ཁའི་ཟས་གཙོ་ཅན་ཅིག་ཨིན་སྦེ་བཤདཔ་ཨིན་མས། དེ་མ་ཚད་ ལོ་གསར་དང་དུས་སྟོན། ཚེས་བཅུ་དང་ཚོགས་འཁོར་ཚུ་གི་སྐབས་ལུ་ཡང་ བཟོ་ནི་ཡོད་པའི་ཁར་ མི་ཤིའི་སྐབས་ལུ་ཡང་ ཟས་བསྔོའི་གྲངས་སུ་ངེས་པར་དུ་བཟོ་སྟེ་ བཀལ་སྲོལ་ཡོད་པའི་གཡུས་ལུགས་ཀྱི་ ཟས་ཁག་ཆེ་ཤོས་ཅིག་ཨིན་རུང་ དུས་ཚོད་འདི་མྱ་ངན་གྱིས་གདུང་པའི་སྐབས་འབདཝ་ལས་ ཇ་ཙམ་དང་ཟ་ནིའི་ཟས་སྦེ་དྲངས་སྲོལ་མེདཔ་ཨིན་མས། ང་བཅས་རའི་རྒྱལ་ཁབ་ཀྱི་རྫོང་ཁག་ ཉི་ཤུའི་ནང་ ས་གནས་ཀྱི་ཆགས་ཚུལ་དང་ ས་ཁ་མཐོ་དམའ་ དེ་ལས་ཚ་དྲོད་དང་བསྟུན་ཏེ་ ལོ་ཐོག་ཚུ་བཏབ་ནི་དང་བསྡུ་ནིའི་དུས་ཚོད་ཚུ་ཡང་ སོ་སོར་སྦེ་འོངམ་ཨིན། ད་རེས་ཞིབ་འཚོལ་འབད་སའི་ས་གནས་ བུམ་ཐང་རྫོང་ཁག་ སྟང་རྒེད་འོག་ ཨྱོན་ཆོས་གླིང་གཡུས་ཚན་ནང་ འབྲུ་སྣ་ཀར་འདི་ རང་ཟླ ༨ པའི་ཟླ་མཇུག་ཁམས་ལུ་བཏབ་སྟེ་ རང་ཟླ་ ༦ པ་དང་ ༧ པའི་ནང་བསྡུཝ་ཨིན་མས།

ཡོངས་གྲགས་ལུ་ ཕྱུར་གོ་མར་བརྔོ་ཟེར་སླབ་སྲོལ་ཡོད་རུང་ ཧཱ་པའི་གཡུས༌སྐད༌ལས༌ ཕྱུར་ཕྱལ་འེར་སླབ་ཨིན་མས། ཕྱུར་ཕྱལ་འདི་ འབྲུག་རྒྱལ་ནང་གི་བཞེས་སྒོ་ཚུ་གི་ནང་ལས་ རང་གཡུས་ཀྱི་བཞེས་སྒོ་ཡོངས་གྲགས་ཅན་ཅིག་ཨིན། ཚེ་རིང་དཔལ་འབྱོར་གྱིས་ ཨ་པ་ལུ་ ཕྱུར་ཤལ་བཟོ་ཐངས་ནམ་ལས་བྱུང་ཡི་ག་ཟེར་དྲི་བའི་སྐབས་ ཨ་པ་གི་ཨ་པའི་སྐབས་ལས་ར་བཟོ་ནི་ཡོད་ཟེར་སླབ་མ་གཏོགས་ གཏན་འཁེལ་བཤད་རྒྱུས་མིན་འདུག་ཟེར་ཨིན་མས། ག་ལས་སྐོར་རུང་ དང་ཕུག་ལ་ནོར་ཡོད་མི་ཚུ་གིས་ ཕྱུར་ཤལ་མར་བརྔོ་བཟོཝ་ངེས་བདེན་ཨིནམ་ཁོ་གིས་ཧ་གོ་ཡི་ཟེར་སླབ་དེས། ཕྱུར་ཤལ་ཕོ་ལེབ་འདི་ གྲུ་བཞི་སྦེ་དྲ་ཞིནམ་ལས་ མར་ནང་བླུགས་ དེ་ལས་གུ་རམ་བླུགས་ཏེ་བཟོ་མི་འདི་ལུ་སླབ་ཨིན། བཞེས་སྒོ་འདི་ ཧཱ་རྫོང་ཁག་གི་མངའ་འོག་ལུ་ ལ་ནོར་ཡོད་མི་ཚུ་གི་བཞེས་སྒོ་ཨིནམ་མ་ཚད་ རྒྱུ་གཙོ་བོ་ལ་ནོར་དང་མཐའ་ནོར་གྱི་ཨོམ་ལས་བཟོཝ་ཨིན་མས། ཕྱུར་ཕྱལ་གི་བཟོ་རྣམ་དེ་ཡང་ ཐོ་གང་གྲུ་བཞི་ལེབ་ཏ་སྦེ་འོངམ་ཨིནམ་ད་ ཚོས་གཞི་དཀརཔོ། སྦོམ་ཆུང་གི་ཐད་ཁར་ རང་གི་བློ་འདོད་དང་འཁྲིལ་ཏེ་བཟོཝ་ཨིན་མས། ཕྱུར་ཕྱལ་འདི་ དུས་ནམ་ར་བཟོཝ་ཨིན་ན་ཟེར་བ་ཅིན་ ལོ་བསྟར་གྱི་ཆོ་གུ་སྐབས་དང་ མགྱོནམོ་གསརཔ་འོངམ་ད། དེ་ལས་ དུས་སྟོན་ཚུ་གི་སྐབས་ལུ་ བཟོ་སྟེ་ལོངས་སྤྱོདཔ་མ་ཚད་ འཕྲལ་འཕྲལ་སྐབས་ རང་གི་ཁྱིམ་ནང་མགྱོནམོ་གསརཔ་རེ་འོངམ་ད་ཟ་ནི། དངུལ་ཁག་ཆེ་བའི་སྐབས་སུ་བཙོང་ནི། མི་གཞན་ལུ་ཁྱོསམ་ཕྱག་མཇལ་སྦེ་ཕུལ་ནི་ཚུ་གི་དོན་ལུ་བཟོཝ་ཨིན་མས།

གཞུང་བརྔོ་མཛརཝ་ཟེར་མི་འདི་ ཆུམ་གྱི་རིགས་མ་འདྲཝ་ཚུ་ བརྔོ་སྟེ་བཟོ་ཡོད་པའི་ ཡོངས་གྲགས་ལུ་ ཇ་རྩམ་གྱི་རིགས་ཅིག་ལུ་སླབ་ཨིན། མཛརཝ་ཟེར་མི་ཐ་སྙད་འདི་གི་དོན་དག་འདི་ཨིན་ཟེརཝ་ ངག་རྒྱུན་དང་ ཡིག་ཐོག་ག་ཏེ་ཡང་བཀོད་འདི་མེདཔ་ལས་ དུས་དང་ཕུ་ལས་ ཁ་རྒྱུན་སྦེ་སླབ་སྲོལ་དར་ཏེ་ཡོད་པའི་མིང་ཅིག་ཨིན་མས། གཞུང་བརྔོ་མཛརཝ་འདི་ ལོ་བསྟར་ལོ་ཆོག་གི་སྐབས་ལུ་དང་ ལོ་གསར་ཉི་ལོག་ཚུ་གི་སྐབས་ལུ་ ཇ་རྩམ་མེད་ཐབས་མེདཔ་ཅིག་ཨིན་པའི་ཁར་ མཛརཝ་ལྷམ་པ་མ་འདྲཝ་ཚུ་ ཚོགས་རྫས་སྦེ་ཡང་སྒྲིག་སྲོལ་ཡོདཔ་ཨིན། མཛརཝ་འདི་ མར་དང་གཅིག་ཁར་སྒྱེས་ཏེ་ མཛརཝ་མར་སྒྱེས་ཟེར་ ཇ་རྩམ་གྱི་ལྷམ་པ་བསྒྲིགས་ཡོད་པའི་གྲས་ལས་ ཇ་རྩམ་རྡིག་ཤོས་ཅིག་སྦེ་རྩིཝ་མ་ཚད་ སྤྱིར་བཏང་ གྲོང་གསེབ་གཡུས་སྒོ་ཚུ་ནང་ མེད་ཐབས་མེདཔ་ཅིག་སྦེ་བརྩིཝ་ཨིན། འདི་ཡང་ ཁྱིམ་ནང་ ནང་གི་ཨ་མའི་ལག་ཤུལ་བདེ་ནིའི་དོན་ལུ་ མཛརཝ་འདི་ དུས་ཨ་རྟགས་ར་ མ་ཆད་པར་བཞག་ཞིནམ་ལས་ ཁྱིམ་ནང་ མགྱོནམོ་ དྲག་ཞན་ཆེ་ཆུང་ ག་བཟུམ་ཅིག་འོང་རུང་ བསུ་བ་ ཇ་དང་མཛརཝ་ ཡང་ན་ ཆང་གིས་འབདཝ་ཨིན་མས།

ཧཱ་པའི་ཕི་ལུ་ཟེར་མི་འདི་ འབྲུག་རྒྱལ་ཁབ་ནང་ཡོངས་གྲགས་ཅན་གྱི་ཟས་ཅིག་ཨིན། ཚེ་རིང་དཔལ་འབྱོར་གྱིས་ཨ་པ་ལུ་ ཕྱུར་ཤལ་བཟོ་ཐངས་ནམ་ལས་བྱུང་ཡི་ག་ཟེར་དྲི་བའི་སྐབས་ ཨ་པ་གི་ཨ་པའི་སྐབས་ལུ་རང་བཟོ་ནི་ཡོད་ཟེར་སླབ་མ་གཏོགས་ གཏན་འཁེལ་བཤད་རྒྱུས་མིན་འདུག་ཟེར་ཨིན་མས། ག་ལས་སྐོར་རུང་ དང་ཕུ་ལ་ནོར་ཡོད་མི་ཚུ་གིས་ ཕི་ལུ་བཟོཝ་ངེས་བདེན་ཨིནམ་ཁོ་གིས་ཧ་གོ་ཡི་ཟེར་སླབ་ནི་འདུག། ཕི་ལུ་འདི་ བཀྱག་འབད་བ་ཅིན་ དཀརཔོ་སྦེ་ཡོད་པའི་ཁར་ ཤན་ཐག་བཟུམ་སྦེ་ནར་ནོར་འཚམས་ཅིག་སྦེ་འོངམ་ཨིན་མས། སྤྱི་བཏང་ ཕི་ལུ་འདི་ ཧཱ་རྒྱུད་བཞི་གི་མི་སེར་ ལ་ནོར་དང་གཅིག་སྡོད་མི་ཚུ་གི་བཞེས་སྒོ་ཅིག་ཨིན་ཏེ་འབད་རུང་ རང་གི་ཁྱིམ་ནང་ ལོ་ཆོག་གཏངམ་ད་དང་ དུས་སྟོན་བརྩི་སྲུང་ཚུ་གི་སྐབས་ལུ་ ལ་མར་ཡང་ན་ བ་མར་ནང་བརྔོ་ཞིནམ་ལས་ བཞེས་སྒོ་རྡིག་རྡིགམ་ཅིག་སྦེ་བརྩིས་ཏེ་ ཟ་བའི་སྲོལ་འདུག། ཕི་ལུ་བཟོ་ཐངས་འདི དང་ཕུ་ལ་ནོར་གྱི་ཨོམ་གྱི་བཟོཝ་ཨིན་རུང་ དེང་སང་སྒོ་ནོར་སེམས་ཅན་གྱི་ཨོམ་གྱི་ཡང་བཟོཝ་ཨིན་མས།

ང་བཅས་རའི་ འབྲུག་རྒྱལ་ཁབ་ནང་ལས་འཐོན་པའི་ འབྲུ་སྣ་དགུའི་གྲལ་ལས་ རྗེན་འཐག་ཕྱེ་ཟེར་ ཀར་མ་བརྔོ་བར་ཕྱེ་འཐག་སྟེ་ བཟོ་བའི་ཇང་བུ་ལི་འདི་ དུས་དང་ཕུག་ལས་རང་ བུམ་ཐང་སྡེ་བཞིའི་རྒེད་འོག་ཚུ་ནང་ བཞེས་སྒོ་ཚུ་ལས་གཙོ་ཅན་དང་ ཁག་ཆེ་ཤོས་ཅིག་སྦེ་ མི་རབས་ལས་མི་རབས་བརྒྱུད་དེ་ ལག་ལེན་འཐབ་སྟེ་སྡོད་ནུག། དེ་ལུ་ བུམ་ཐང་པའི་ངག་གཤིས་ནང་ལས་འབད་བ་ཅིན་ བྱང་བུ་ལི་དང་ ཡང་ཅིན་ བྱང་བ་ལི་ཟེར་སླབ་ཨིན་རུང་ གཏེར་སྟོན་པདྨ གླིང་པའི་རྣམ་ཐར་ནང་ལུ་ཨིན་པ་ཅིན་ བྱང་བུ་ལེབ་ཟེར་བཀོད་དེ་འདུག། དེ་ཡང་ དང་ཕུ་བུམ་ཐང་གི་ལུང་ཕྱོགས་འདི་ནང་ རེད་ཚུ་རྩ་ལས་མ་ཚོཔ་ལས་ ཆུམ་གྱི་རིགས་ ཐོབ་པར་ལཱ་ཁག་ཡོད་ནི་དེ་གིས་ ལྟོ་ཟ་ནི་འདི་ ག་ནི་བ་དཀོན་དྲགས་ཅིག་ཨིན་མས། ལྟོ་འདི་ཟ་སྤྱོད་འབད་ནི་འདི་ ལོ་གསར་དང་དུས་སྟོན་ཚུ་གི་སྐབས་ལུ་ མི་འབྱོར་པ་ཅན་ཚུ་གིས་ རྐྱངམ་གཅིག་མ་གཏོགས་ སྤྱིར་བཏང་ག་ར་གིས་ ཟ་ཚུགས་པར་ལཱ་ཁག་ཡོད་ཟེར་བཤདཔ་ཨིན་པས། དེ་འབདཝ་ད་ ད་རེས་ནངས་པ་ རྫོང་ཁག་དེ་ནང་གི་རྒེད་འོག་དང་ གཡུས་སྒོ་ག་རའི་ནང་ མི་སེར་ཆེ་འབྲིང་ཆུང་གསུམ་ག་ར་དང་ ཐ་ན་ ལ་གུང་གསུམ་གྱི་མི་སེར་ཚུ་གིས་ཡང་ ཆུམ་རིགས་ཀྱི་ལྟོ་ལུ་གཙོ་བོར་བཏོན་ཏེ་སྡོདཔ་མ་གཏོགས་ ཕྱེའི་རིགས་ལས་བཟོ་བའི་ ཁུར་བཱ། བྱང་བུ་ལི་དང་པུ་ཏ་ལ་སོགས་པ་ཚུ་ ཟ་སྤྱོད་འབད་མི་གངམ་མེདཔ་ལས་ དུས་རིམ་བཞིན་དུ་ ཉམས་འགྱོ་ནིའི་དུམ་ཁ་ལྷོད་དེ་ཡོདཔ་ལས་ ད་རེས་ ཟ་འདོད་ཡོད་མི་ཚུ་གིས་དམིགས་གསལ་སྦེ་ མགྱོན་ཚུ་བྱོནམ་དང་ དེ་ལས་ དུས་སྟོན་ཚུ་གི་སྐབས་དང་ དེ་མེན་པ་ཅིན་ མཁོ་མངགས་ལོགས་སུ་སྦེ་འབད་དེ་མ་གཏོགས་ བཞེས་སྒོ་གཞན་ཚུ་བཟུམ་སྦེ་ དུས་རྒྱུན་ཐོབ་ཆོག་ཆོག་དང་ཟ་ཆོག་ཆོག་མེདཔ་ཨིན་པས། བྱང་བུ་ལི་བཟོ་ནི་འདི་ ཧེ་མའི་དུས་ལུ་འབད་བ་ཅིན་ ཀེབ་ཏ་སྦེ་བསྒྲིལ་ཞིནམ་ལས་ སྦོམ་ཆུང་སོར་གང་རེ་དང་ རིང་ཐུང་ལག་གང་རེ་གི་རྩིས་བཏོགས་ཏེ་ བཟོཝ་ཨིན་རུང་ ད་རེས་ནངས་པ་ འཕྲུལ་ཆས་ཚུ་ལག་ལེན་འཐབ་སྟེ་ བཟོ་ནིའི་སྲོལ་ཡང་དར་ཏེ་འདུག། ཇང་བུ་ལི་འདི་ དུས་རྒྱུན་དུ་ཟ་སྤྱོད་འབད་སྲོལ་མེད་རུང་ འཕྲལ་འཕྲལ་སྦེ་ བཞེས་སྒོ་ཁ་སོར་ཏེ་ཟ་བའི་ཁར་ སྤྲོ་ཟས་དང་བཞེས་སྒོ་སྣ་མང་གི་གྲངས་སུ་བཙུགས་ཏེ་ སྤྱོད་སྲོལ་ཡང་ཡོདཔ་ཨིན་མས།

ལག་ཟས་ཀེབ་ཏང་འདི་ མང་ཤོས་ར་ ནོར་འཚོ་མི་དང་ ཕར་ཚུར་འགྲོ་འགྲུལ་འབད་མི་ཚུ་ ལམ་ཁར་ལྟོ་མི་བཀྱེས་ནིའི་དོན་ལུ་ ལམ་འགྱོ་བཞིན་དང་ལཱ་འབད་བཞིན་དུ་ ལག་ཐོག་ཟས་སྦེ་ཟ་ནི་འདི་གིས་ ལག་ཟས་ཀེབ་ཏང་ཟེར་སླབ་ཨིན་མས། བཤད་སྲོལ་ཅིག་ལས་འབད་བ་ཅིན་ ཕར་ཚུར་འགྲོ་འགྲུལ་འབད་མི་དང་ ལྷག་པར་དུ་ ལ་ཁ་མཐོ་སར་འགྱོཝ་ད་ ལ་སྡུག་མི་བཤེད་ནིའི་རྫས་ཅིག་འབད་ནི་འདི་གིས་ དེ་ལུ་ལ་རྫས་ཀེབ་ཏང་ཟེར་སླབ་ཨིན་ཟེར་བཤད་ནི་འདུག། དེའི་བཟོ་རྣམ་འདི་ སྟུག་པག་པག་དང་སྒོར་སྒོ་སྦེ་ ལ་ཆུའི་སྒོར་བཟུམ་སྦེ་ཡོད་ནི་འདི་གིས་ ལ་ལུ་གིས་ལ་ཆ་ཀེབ་ཏང་ཟེར་ཡང་སླབ་ཨིན་མས། འ་ནི་བཟུམ་གྱི་ཀེབ་ཏང་འདི་ འབྲུག་ནུབ་ཕྱོགས་པ་ཚུ་གིས་ཡང་ ཟ་སྤྱོད་འབད་ནི་ཡོདཔ་དང་ འདི་ཡང་ ལྷམ་པ་མ་འདྲཝ་གཉིས་སྦེ་བཟོ་ནི་ཡོད། འདི་ཡང་ གོང་གསལ་འབྲུ་སྣའི་ཕྱེ་ལག་ལེན་འཐབ་སྟེ་ གོ་སླང་ངམ་ རྡོ་ཡུག་དང་ལྕགས་ཡུག་གང་རུང་གུ་ལུ་དང་ དེ་གི་ཤུལ་མ་ མེ་ནང་བསྲེག་སྟེ་བཟོ་མི་ལུ་ ཏེ་ཟས་དང་ དེ་བཟུམ་སྦེ་ བཟོ་དབྱིབ་ཅོག་འཐད་རུང་ བར་ན་དོང་བཏོན་ཞིན་ན་ ཆུ་ཚན་ནང་ལུ་བཙོ་སྟེ་བཟོ་མི་ལུ་ཆུ་ཏེ་ཟེར་སླབ་ཡོདཔ་ཨིན། ལོ་ཐོག་བྱཱོ་དང་རྒྱ་རེད་ལས་བཟོ་སྲོལ་ཡོད་པའི་ ལག་ཟས་ཀེབ་ཏང་འདི་ དུས་དང་ཕུ་ལས་ར་ བུམ་ཐང་སྡེ་བཞིའི་རྒེད་འོག་ཚུ་ནང་ མི་རབས་ལས་མི་རབས་བརྒྱུད་དེ་ ལག་ལེན་དང་ཟ་སྤྱོད་འབད་དེ་སྡོད་ནུག། དེ་ཡང་ དུས་རྒྱུན་གྱི་བཞེས་སྒོ་སྦེ་ཟ་སྲོལ་མེད་རུང་ ནོར་འཚོ་མི་དང་ ཕར་ཚུར་འགྲོ་འགྲུལ་འབད་མི་ ལ་མཐོ་ས་དང་དམའ་སར་ ག་ཏེ་ར་འགྱོ་རུང་ ལམ་ཁར་ལྟོ་མི་བཀྱེས་ནིའི་དོན་ལུ་ ལམ་འགྱོ་བཞིན་དང་ལཱ་འབད་བཞིན་དུ་ ལག་ཐོག་ཟས་སྦེ་ཟཝ་ཨིན་མས། འདི་བཟོ་བའི་སྐབས་ བྱཱོ་ཕྱེ་དང་ རྒྱ་རེད་ཕྱེ་ནང་ ཆང་དང་གུ་རམ་ བ་མར་ཚུ་བླུགས་ཏེ་བཟོ་ནི་དེ་གིས་ བཅུད་ཆེ་དྲགས་ཡོདཔ་ལས་ ལམ་ཁར་ལྟོ་རྩ་ལས་མི་བཀྱེསཔ་མ་ཚད་ ས་ཁ་མཐོ་སར་འགྱོ་མི་ཚུ་ལུ་ ལ་སྡུག་ཡང་མ་ཐོབ་པའི་ཁེ་ཕན་ཡོདཔ་ཨིན་མས། ཧེ་མའི་དུས་ལུ་འབད་ཅིན་ ཕར་ཚུར་འགྲོ་འགྲུལ་འབད་བའི་སྐབས་ ད་རེས་ནང་པ་བཟུམ་སྦེ་ སྣུམ་འཁོར་གྱི་ལམ་དང་སྣུམ་འཁོར་ཚུ་མེད་ནི་འདི་གིས་ མང་ཤོས་རང་ རྐང་སྟོང་སྦེ་འགྱོ་དགོཔ་ད་ ལམ་ཁར་བཞེས་སྒོའི་རིགས་ག་ནི་ཡང་འཐོབ་ཐབས་མེདཔ་ལས་ ལྟོ་མི་བཀྱེས་ནིའི་དོན་ལུ་སྤྱོད་སྲོལ་ཡོད་རུང་ ད་རེས་ནངས་པ་ དེ་བཟུམ་མའི་དཀའ་ངལ་ཚུ་མེདཔ་ལས་ གནམ་བྱཱར་གྱི་དུས་ལུ་ ལ་ཁ་ལུ་དབྱར་རྩ་དགུན་འབུཔ་འཐུ་བར་འགྱོ་མི་རེ་རེ་གཉིས་གཉིས་ཀྱིས་ ལ་ཁར་ལ་སྡུག་མི་འཐོབ་ནི་དང་ ལྟོ་བཀྱེསཔ་བསང་ནིའི་དོན་ལུ་ ཨ་ཙི་རེ་ལག་ལེན་འཐབ་མ་གཏོགས་ ཡོངས་གྲགས་སྦེ་སྤྱོད་སྲོལ་མེད་ནི་དེ་གིས་ ཉམས་འགྱོ་ནིའི་ཉེན་ཁ་སྦོམ་འདུག་ཟེར་བསམ་འཆར་བཤད་ནི་འདུག། ལག་ཟས་ཀེབ་ཏང་འདི་ དུས་རྒྱུན་དུ་ཟ་སྤྱོད་འབད་སྲོལ་མེད་པའི་ཁར་ སྤྲོ་ཟས་དང་ མཆོད་པའི་ཟས་སྦེ་ ཚོགས་ལ་སོགས་པ་ཚུ་ནང་ཡང་ ལག་ལེན་འཐབ་སྲོལ་མེདཔ་ཨིན་མས།

འབྲུ་སྣ་དགུའི་གྲལ་ལས་ ལོ་ཐོག་བྱཱོ་དང་རྒྱ་རེད་ལས་བཟོ་སྲོལ་ཡོད་པའི་ བུམ་ཐང་པའི་ཁྲོམ་འདི་ དུས་དང་ཕུ་ལས་ར་ བུམ་ཐང་སྡེ་བཞིའི་ རྒེད་འོག་ཚུ་ནང་ ནོར་རྫིཔ་ཚུ་གིས་ཉི་མའི་བཞེས་སྒོ་སྦེ་ ཟ་སྤྱོད་འབད་དེ་སྡོད་ནུག། དེ་ཡང་ དང་ཕུ་བུམ་ཐང་གི་ལུང་ཕྱོགས་འདི་ནང་ བྱཱ་གི་རིགས་རྩ་ལས་མ་ཚོཔ་ལས་ ཆུམ་འདི་འཐོབ་པར་ལཱ་ཁག་ཡོད་ནི་དེ་གིས་ ལྟོ་ཟ་ནི་འདི་ ག་ནི་བ་དཀོན་དྲགས་ཅིག་ཨིན་མས། ལོ་གསར་དང་དུས་སྟོན་ཚུ་གི་སྐབས་ལུ་ མི་འབྱོར་པ་ཅན་ཚུ་གིས་རྐྱངམ་གཅིག་མ་གཏོགས་ སྤྱིར་བཏང་ག་ར་གིས་ཟ་ཚུགས་པར་ ལཱ་ཁག་ཡོད་ཟེར་བཤདཔ་ཨིན་པས། དེ་འབདཝ་ད་ དུས་ད་རེས་ནངས་པ་ རྫོང་ཁག་དེ་ནང་གི་རྒེད་འོག་དང་གཡུས་སྒོ་ག་རའི་ནང་ མི་སེར་ཆེ་འབྲིང་ཆུང་གསུམ་ག་ར་དང་ ཐ་ན་ ལ་གུང་གསུམ་གྱི་མི་སེར་ཚུ་གིས་ཡང་ ཆུམ་རིགས་ཀྱི་ལྟོ་ལུ་ གཙོ་བོར་བཏོན་ཏེ་སྡོདཔ་མ་གཏོགས་ ཕྱེའི་རིགས་ལས་བཟོ་བའི་ཁྲོམ་དང་ཁུར་བ། པུ་ཏ་ལ་སོགས་པ་ཚུ་ ཟ་སྤྱོད་འབད་མི་གངམ་མེདཔ་ལས་ ཉམས་འགྱོ་ནིའི་དུམ་ཁ་ལྷོད་དེ་ཡོདཔ་ལས་ ད་རེས་ ཟ་འདོད་ཡོད་མི་ཚུ་གིས་ དམིགས་གསལ་སྦེ་ མཁོ་མངགས་འབད་དེ་མ་གཏོགས་ བཞེས་སྒོ་གཞན་ཚུ་བཟུམ་སྦེ་ དུས་རྒྱུན་ཐོབ་ཆོག་ཆོ་དང་ ཟ་ཆོག་ཆོ་མེདཔ་ཨིན་པས། ཁྲོམ་འདི་བཟོཝ་ད་ དང་པ་ ཁུར་བཱ་ལྷོག་དོ་བཟུམ་སྦེ་ རྡོ་ཡུག་བྱེན་ཞིན་ད་བཟོཝ་ཨིན་རུང་ ཁུར་བཱ་བཟུམ་སྦེ་མེན་པར་ཕྱེ་རྡུར། དེ་ནང་ རྫས་སྦྱོར་ ཚྭ་དང་ཨེ་ཕྱེ། ཐིང་ངེ་ཚུ་གཅིག་ཁར་སྦྱོར་ཞིན་ན་བླུགས་ཏེ་ གཡས་གཡོན་གྱི་མཐའམ་གཉིས་བལྟབ་སྟེ་ བཟོཝ་ཨིན་མས། ཁྲོམ་ཟ་སྤྱོད་འབད་ནི་འདི་ དང་ཕུ་ནོར་རྫིཔ་ཚུ་གིས་ ཉི་མའི་འཛརཝ་སྦེ་ཟཝ་ཨིན་རུང་ ད་རེས་ནངས་པ་ འདི་ལག་ལེན་དང་ཟ་སྤྱོད་འབད་མི་མེདཔ་ལས་ ཉམས་འགྱོ་ནིའི་གནས་སྟངས་གུར་ལྷོད་དེ་འདུག་ཟེར་བཤདཔ་ཨིན་མས།