འབྲུ་སྣ་དགུའི་གྲལ་ལས་ ལོ་ཐོག་བྱཱོ་དང་རྒྱ་རེད་ལས་བཟོ་སྲོལ་ཡོད་པའི་ བུམ་ཐང་པའི་ཁྲོམ་འདི་ དུས་དང་ཕུ་ལས་ར་ བུམ་ཐང་སྡེ་བཞིའི་ རྒེད་འོག་ཚུ་ནང་ ནོར་རྫིཔ་ཚུ་གིས་ཉི་མའི་བཞེས་སྒོ་སྦེ་ ཟ་སྤྱོད་འབད་དེ་སྡོད་ནུག། དེ་ཡང་ དང་ཕུ་བུམ་ཐང་གི་ལུང་ཕྱོགས་འདི་ནང་ བྱཱ་གི་རིགས་རྩ་ལས་མ་ཚོཔ་ལས་ ཆུམ་འདི་འཐོབ་པར་ལཱ་ཁག་ཡོད་ནི་དེ་གིས་ ལྟོ་ཟ་ནི་འདི་ ག་ནི་བ་དཀོན་དྲགས་ཅིག་ཨིན་མས། ལོ་གསར་དང་དུས་སྟོན་ཚུ་གི་སྐབས་ལུ་ མི་འབྱོར་པ་ཅན་ཚུ་གིས་རྐྱངམ་གཅིག་མ་གཏོགས་ སྤྱིར་བཏང་ག་ར་གིས་ཟ་ཚུགས་པར་ ལཱ་ཁག་ཡོད་ཟེར་བཤདཔ་ཨིན་པས།

དེ་འབདཝ་ད་ དུས་ད་རེས་ནངས་པ་ རྫོང་ཁག་དེ་ནང་གི་རྒེད་འོག་དང་གཡུས་སྒོ་ག་རའི་ནང་ མི་སེར་ཆེ་འབྲིང་ཆུང་གསུམ་ག་ར་དང་ ཐ་ན་ ལ་གུང་གསུམ་གྱི་མི་སེར་ཚུ་གིས་ཡང་ ཆུམ་རིགས་ཀྱི་ལྟོ་ལུ་ གཙོ་བོར་བཏོན་ཏེ་སྡོདཔ་མ་གཏོགས་ ཕྱེའི་རིགས་ལས་བཟོ་བའི་ཁྲོམ་དང་ཁུར་བ། པུ་ཏ་ལ་སོགས་པ་ཚུ་ ཟ་སྤྱོད་འབད་མི་གངམ་མེདཔ་ལས་ ཉམས་འགྱོ་ནིའི་དུམ་ཁ་ལྷོད་དེ་ཡོདཔ་ལས་ ད་རེས་ ཟ་འདོད་ཡོད་མི་ཚུ་གིས་ དམིགས་གསལ་སྦེ་ མཁོ་མངགས་འབད་དེ་མ་གཏོགས་ བཞེས་སྒོ་གཞན་ཚུ་བཟུམ་སྦེ་ དུས་རྒྱུན་ཐོབ་ཆོག་ཆོ་དང་ ཟ་ཆོག་ཆོ་མེདཔ་ཨིན་པས།

ཁྲོམ་འདི་བཟོཝ་ད་ དང་པ་ ཁུར་བཱ་ལྷོག་དོ་བཟུམ་སྦེ་ རྡོ་ཡུག་བྱེན་ཞིན་ད་བཟོཝ་ཨིན་རུང་ ཁུར་བཱ་བཟུམ་སྦེ་མེན་པར་ཕྱེ་རྡུར། དེ་ནང་ རྫས་སྦྱོར་ ཚྭ་དང་ཨེ་ཕྱེ། ཐིང་ངེ་ཚུ་གཅིག་ཁར་སྦྱོར་ཞིན་ན་བླུགས་ཏེ་ གཡས་གཡོན་གྱི་མཐའམ་གཉིས་བལྟབ་སྟེ་ བཟོཝ་ཨིན་མས། ཁྲོམ་ཟ་སྤྱོད་འབད་ནི་འདི་ དང་ཕུ་ནོར་རྫིཔ་ཚུ་གིས་ ཉི་མའི་འཛརཝ་སྦེ་ཟཝ་ཨིན་རུང་ ད་རེས་ནངས་པ་ འདི་ལག་ལེན་དང་ཟ་སྤྱོད་འབད་མི་མེདཔ་ལས་ ཉམས་འགྱོ་ནིའི་གནས་སྟངས་གུར་ལྷོད་དེ་འདུག་ཟེར་བཤདཔ་ཨིན་མས།

བུམ་ཐང་པའི་ཁྲོམ་འདི་གིས་ བུམ་རྫོང་ཁག་གི་གཡུས་ཚན་ཚུ་གི་ ངོ་རྟགས་སྟོནམ་ཨིནམ་རུང་ དུས་རྒྱུན་གྱི་བཞེས་སྒོའི་སྣ་ཁ་སྦེ་ཟ་སྤྱོད་འབད་སྲོལ་མེད་པའི་ཁར་ སྤྲོ་ཟས་དང་ཟས་རྡིག་རྡིགམ། ཚོགས་རྫས་ལ་སོགས་པ་ཚུ་གི་དོན་ལུ་ཡང་ ལག་ལེན་འཐབ་སྲོལ་མེདཔ་ཨིན་མས།

གཡུས་སྒོ་འདི་ནང་ ཁྲོམ་ཟ་སྤྱོད་འབད་ནི་འདི་ དུས་དང་ཕུ་ལས་ར་ མི་རབས་ལས་མི་རབས་བརྒྱུད་དེ་ ལག་ལེན་འཐབ་སྟེ་འོང་ཡོད་རུང་ བཞེས་སྒོ་གཞན་རིགས་བཟུམ་སྦེ་ ཟ་སྤྱོད་འབད་ནི་ལུ་དང་འདོད་བསྐྱེད་མི་གངམ་མེདཔ་ལས་ ཉམས་འགྱོ་ནིའི་ཉེན་ཁ་འདུག་ཟེར་ ཨམ་ཤེས་རབ་སྒྲོལ་མ་གིས་བཤདཔ་ཨིན་མས། ཨིན་རུང་ ལྕང་འོག་གཡུས་ཚན་ནང་ ཨཔ་བླམ་མགོན་པོ་དང་ ཨམ་བཀྲིས་གཉིས་ལས་བརྒྱུད་པའི་བུ་ ཡེ་ཤེས་དཔལ་འབྱོར་དང་ ཨཔ་རྟ་པོ་དང་ཨམ་བཀྲིས་མོ་གཉིས་ལས་བརྒྱུད་པའི་བུམོ་ ཅིང་མོ་གཉིས་ལས་ ད་རེས་ སྐྱེས་ལོ་ ༥༣ ལང་མི་ཨམ་ཤེས་རབ་སྒྲོལ་མ་གིས་ མོ་ར་ཆུང་ཀུ་སྦེ་སྡོད་པའི་བསྒང་ལས་ར་ ཁྲོམ་བཟོ་ནིའི་རྒྱུ་གཙོ་བོ་ བྱཱོ་དང་ རྒྱ་རེད་ཚུ་ཞིང་ཁར་སོན་བཏབ་ནིའི་དུས་ཚོད་དང་ བསྡུ་ཐངས་ཀྱི་ལག་ལེན་གྱི་རིམ་པ་ཚུ་ མོ་རའི་ཕམ་ཚུ་ལས་ མ་བཏུབ་བཏུབ་སྦེ་ལྷབ་སྦྱང་འབད་དེ་ཡོད་པའི་ཁར་ མོ་རའི་བུམོ་ སྐྱེས་ལོ་ ༣༥ ལང་མི་ སྒྲོལ་དཀར་ལུ་ཡང་ དེའི་ལག་ལེན་དང་སྦྱང་བ་་ཚུ་ ལེགས་ཤོམ་སྦེ་བྱིན་ཏེ་ ད་རེས་ཁྱིམ་ནང་མགྱོནམོ་ཆེ་འབྲིང་ཆུང་གསུམ་ག་བྱོན་རུང་ བུམ་ཐང་པའི་རང་ལུགས་ཀྱི་བཞེས་སྒོ་ཚུ་ དུས་ནམ་དང་ནམ་ར་དགོ་རུང་ བཟོ་སྟེ་དྲང་ཆོག་ཆོག་སྦེ་སྡོདཔ་ཨིན་མས།

འབྲུ་སྣ་དགུའི་གྲལ་ལས་ བྱཱོ་བཏབ་ནིའི་དུས་ཚོད་འདི་ རང་ཟླ་ ༣ པའི་ནང་བྱ་ཁུ་བྱུག་ལྷོདཔ་ད་དང་ ཡང་ཅིན་ལུང་པ་འདི་ནང་ཡོད་པའི་ཤིང་འབྲས་ གཡུས་སྐད་ལས་ གླི་ཕཱན་ཟེར་མི་(crab apple) གི་མེ་ཏོག་ཤར་བའི་དུས་དང་འཁྲིལ་ བཏབ་ཞིནམ་ལས་ རང་ཟླ་ ༦ པའི་ནང་བསྡུཝ་ཨིན་པས། ཁྲོམ་འདི་ བྱཱོ་དང་རྒྱ་རེད་གཉིས་ཆ་ར་གིས་ བཟོཝ་ཨིན་རུང་ བྱཱོ་ལས་བཟོ་མི་འདི་ཁག་ཏེག་འཚམས་ཅིག་དང་ རྒྱ་རེད་ལས་བཟོ་མི་འདི་མངརམ་འཚམས་ཅིག་འོངམ་ཨིན་མས། ལོ་ཐོག་རྒྱ་རེད་འདི་ ཟླཝ་ ༥ པའི་ནང་ ལུང་ཕྱོགས་འདི་ནང་ ཁྱབ་ཆེ་དྲགས་ཡོད་པའི་ ཨོ་ལའི་ཕྱུ་གུ་ཚུ་ ཚང་ནང་ལས་ཐོན་ཏེ་ ཕྱི་ཁར་འཁྱམས་པའི་དུས་ཚོད་དང་འཁྲིལ་ཏེ་ བཏབ་སྲོལ་ཡོདཔ་ཨིན་མས། དེ་ཡང་ བར་ན་ཞག་གྲངས་ ༡༥ རེ་སྦེ་ དུས་རིམ་གསུམ་སྦེ་བརྩིས་སྲོལ་ཡོད་མི་འདི་ཡང་ དང་པ་དང་ གཉིས་པ་ གསུམ་པ་ཟེར་བརྩིས་སྲོལ་ཡོད་མིའི་གྲལ་ལས་ དང་པ་དང་ གསུམ་པའི་ནང་ཚུད་པ་ཅིན་ ལོ་ཐོག་ཡང་ལེགས་ཏེ་འབྲས་བུ་ ལེགས་ཤོམ་སྦེ་འཚོཔ་ཨིན་རུང་ དུས་རིམ་གཉིས་པའི་ནང་ཚུད་སོང་པ་ཅིན་ བར་གའིུ་ནང་ཚུད་ནུག་ཟེར་ རྒྱ་རེད་འདི་ མེ་ཏོག་རྐྱངམ་ཅིག་ཤར་ཏེ་ འབྲས་བུ་ལེགས་ཤོམ་སྦེ་མི་ཚོ་ཟེར་ བཤད་སྲོལ་ཡང་འདུག། དེ་ལས་ ཟླཝ་ ༨ པའི་ཟླ་མཇུག་ཁམས་ལུ་བསྡུ་སྟེ་ ཐོག་ཕུད་དང་པ་འདི་ རྒེད་འོག་འདི་ནང་ཡོད་པའི་ ཐང་སྦི་ལྷ་ཁང་གི་ཚེས་བཅུའི་སྐབས་ལུ་ ཁུར་བཱ་དང་པུ་ཏ་ ཇང་བུ་ལི་ལ་སོགས་པ་བཟོ་སྟེ་ ཚོགས་སྦེ་ཕུལ་སྲོལ་ཡོདཔ་ཨིན་མས།

དགོས་མཁོའི་ཅ་ཆས་དང་རྫས་སྦྱོར།
- བྱཱོ་ཕྱེ།/རྒྱ་རེད་ཕྱེ།
- ཀིན་མར། (ཤིང་མར།)/བ་མར།
- ཨེ་ཕྱེ།
- ཚྭ།
- གསིག་མ། ཕྱེ་གསིག་ནིའི་དོན་ལུ་དགོཔ་ཨིན།
- སྤྱོད་/ཤིང་དོབ་/ཟངས་གཞོང་། ཕྱེ་བཏུད་ནིའི་དོན་ལུ་དགོཔ་ཨིན།
- ཚའེ་/ཟན་སྐྱ། ཕྱེ་བཏུད་ནིའི་དོན་ལུ་ལག་ལེན་འཐབ་ཨིན།
- ཐབ། ཁྲོམ་ལྷོག་ནིའི་དོན་ལུ་དགོཔ་ཨིན།
- རྡོ་ཡུག་/ལྕགས་ཡུག། ཁྲོམ་ལྷོག་ནིའི་དོན་ལུ་ མེད་ཐབས་མེདཔ་ཅིག་ཨིན།
- ཐིང་ངེ།

ཁྲོམ་བཟོ་ཐངས་འདི་ཡང་ གཤམ་གསལ་ལྟར་ཨིན།
- རྒྱ་རེ་ཕྱེ་དང་ ཡང་ན་ བྱཱོ་ཕྱེ་དེ་ རྒྱུ་འཝ་དང་ཤིང་ལས་བཟོ་བའི་ཧོད་ ངག་གཤིས་ནང་ལུ་སྤྱོད་ཟེར་མི་འདི་ནང་བླུགས།
- དེ་ལས་ ངག་གཤིས་ནང་ལུ་ཚའེ་ཟེར་སླབ་མི་ བཟོ་རྣམ་ཟན་སྐྱ་ལས་ཨ་ཙི་སྦོམ་སྦེ་ཡོད་མི་འདི་གིས་ ཆུ་དང་གཅིག་ཁར་སླ་བསྲེ་རྐྱབ་སྟེ་ སྐྱོ་མ་ (དཀར་ཅུ།) གར་ལྷ་རན་ཏོག་ཏོ་སྦེ་བཟོ།
- རྡོ་ཡུག་ཐབ་ཁར་དྲོད་བཏགས་ཏེ་ ཀིན་མར་ ཡང་ན་ མར་དབུར་ཞིནམ་ལས་ དཀར་ཅུ་ (སྐྱོ་མ།) སྒོ་ལང་གུར་བླུགས།
- དེ་དང་མཉམ་གཅིག་ ཚྭ་དང་། ཨེ་ཕྱེ། ཐིང་ངེ་ཚུ་ སྦྱོར་ཏེ་ཡོད་མི་འདི་ཡང་ དུས་མཉམ་བླུགས།
- དེ་ལས་ གཟན་སྐྱ་གིས་ཁ་སྙོམས་ཞིནམ་ལས་ གཡས་གཡོན་གྱི་མཐའམ་གཉིས་བལྟབ།
- ལ་ལས་འགྱུར་ཏེ་ཚོཔ་ཅིག་ གཡུས་སྐད་ནང་ ཚང་སྡེར་ཟེར་ རྒྱུ་ཚར་ལས་འཐག་འཐག་པའི་ཧོད་ཅིག་ཡོད་མི་དེ་ནང་བཏོན་ཏེ་བཟོཝ་ཨིན།

ལྕང་བ་གཡུས་ཚན་ནང་ལུ་ ཁྱིམ་གུང་གྲངས་ ༡༣ དེ་ཅིག་ ཕུན་སུམ་ཚོགས་ཏོག་ཏོ་སྦེ་ཆགས་ཏེ་ཡོད་པའི་ཁར་ འཚོ་བ་གཙོ་བོ་སོ་ནམ་ཞིང་ལཱ་ལུ་བརྟེན་ཏེ་སྡོད་པའི་ཁར་ དངུལ་ཐོག་གཙོ་བོ་འདི་ ཀེ་བ་འདི་རང་ཨིན་རུང་ ལོ་ངོ་དག་པ་ཅིག་གི་ཧེ་མ་ལས་ གཞུང་ཞབས་ལས་ དབྱར་རྩ་དགུན་འབུཔ་འཐུ་སྟེེ་ ཚོང་འབྲེལ་འཐབ་ནིའི་གནང་བ་གནང་ཞིནམ་ལས་ དངུལ་གྱི་འོང་འབབ་དང་མི་ཚེ་འཚོ་སྐྱོང་ལུ་ ཁེ་ཕན་གནམ་སེད་ས་མེད་ཐོབ་སྟེ་ཡོདཔ་ལས་ འཚོ་བའི་གནས་སྟངས་ཡང་འགྱུར་བཅོས་སྦོམ་སོང་སྟེ་འདུག།

ཞིབ་འཚོལ་འབད་མི། ཚེ་རིང་དཔལ་འབྱོར། སྒྲིག་སློབ་གཙོ་འཛིན་འོགམ།