ལག་ཟས་ཀེབ་ཏང་འདི་ མང་ཤོས་ར་ ནོར་འཚོ་མི་དང་ ཕར་ཚུར་འགྲོ་འགྲུལ་འབད་མི་ཚུ་ ལམ་ཁར་ལྟོ་མི་བཀྱེས་ནིའི་དོན་ལུ་ ལམ་འགྱོ་བཞིན་དང་ལཱ་འབད་བཞིན་དུ་ ལག་ཐོག་ཟས་སྦེ་ཟ་ནི་འདི་གིས་ ལག་ཟས་ཀེབ་ཏང་ཟེར་སླབ་ཨིན་མས། བཤད་སྲོལ་ཅིག་ལས་འབད་བ་ཅིན་ ཕར་ཚུར་འགྲོ་འགྲུལ་འབད་མི་དང་ ལྷག་པར་དུ་ ལ་ཁ་མཐོ་སར་འགྱོཝ་ད་ ལ་སྡུག་མི་བཤེད་ནིའི་རྫས་ཅིག་འབད་ནི་འདི་གིས་ དེ་ལུ་ལ་རྫས་ཀེབ་ཏང་ཟེར་སླབ་ཨིན་ཟེར་བཤད་ནི་འདུག། དེའི་བཟོ་རྣམ་འདི་ སྟུག་པག་པག་དང་སྒོར་སྒོ་སྦེ་ ལ་ཆུའི་སྒོར་བཟུམ་སྦེ་ཡོད་ནི་འདི་གིས་ ལ་ལུ་གིས་ལ་ཆ་ཀེབ་ཏང་ཟེར་ཡང་སླབ་ཨིན་མས། འ་ནི་བཟུམ་གྱི་ཀེབ་ཏང་འདི་ འབྲུག་ནུབ་ཕྱོགས་པ་ཚུ་གིས་ཡང་ ཟ་སྤྱོད་འབད་ནི་ཡོདཔ་དང་ འདི་ཡང་ ལྷམ་པ་མ་འདྲཝ་གཉིས་སྦེ་བཟོ་ནི་ཡོད། འདི་ཡང་ གོང་གསལ་འབྲུ་སྣའི་ཕྱེ་ལག་ལེན་འཐབ་སྟེ་ གོ་སླང་ངམ་ རྡོ་ཡུག་དང་ལྕགས་ཡུག་གང་རུང་གུ་ལུ་དང་ དེ་གི་ཤུལ་མ་ མེ་ནང་བསྲེག་སྟེ་བཟོ་མི་ལུ་ ཏེ་ཟས་དང་ དེ་བཟུམ་སྦེ་ བཟོ་དབྱིབ་ཅོག་འཐད་རུང་ བར་ན་དོང་བཏོན་ཞིན་ན་ ཆུ་ཚན་ནང་ལུ་བཙོ་སྟེ་བཟོ་མི་ལུ་ཆུ་ཏེ་ཟེར་སླབ་ཡོདཔ་ཨིན།

ལོ་ཐོག་བྱཱོ་དང་རྒྱ་རེད་ལས་བཟོ་སྲོལ་ཡོད་པའི་ ལག་ཟས་ཀེབ་ཏང་འདི་ དུས་དང་ཕུ་ལས་ར་ བུམ་ཐང་སྡེ་བཞིའི་རྒེད་འོག་ཚུ་ནང་ མི་རབས་ལས་མི་རབས་བརྒྱུད་དེ་ ལག་ལེན་དང་ཟ་སྤྱོད་འབད་དེ་སྡོད་ནུག། དེ་ཡང་ དུས་རྒྱུན་གྱི་བཞེས་སྒོ་སྦེ་ཟ་སྲོལ་མེད་རུང་ ནོར་འཚོ་མི་དང་ ཕར་ཚུར་འགྲོ་འགྲུལ་འབད་མི་ ལ་མཐོ་ས་དང་དམའ་སར་ ག་ཏེ་ར་འགྱོ་རུང་ ལམ་ཁར་ལྟོ་མི་བཀྱེས་ནིའི་དོན་ལུ་ ལམ་འགྱོ་བཞིན་དང་ལཱ་འབད་བཞིན་དུ་ ལག་ཐོག་ཟས་སྦེ་ཟཝ་ཨིན་མས། འདི་བཟོ་བའི་སྐབས་ བྱཱོ་ཕྱེ་དང་ རྒྱ་རེད་ཕྱེ་ནང་ ཆང་དང་གུ་རམ་ བ་མར་ཚུ་བླུགས་ཏེ་བཟོ་ནི་དེ་གིས་ བཅུད་ཆེ་དྲགས་ཡོདཔ་ལས་ ལམ་ཁར་ལྟོ་རྩ་ལས་མི་བཀྱེསཔ་མ་ཚད་ ས་ཁ་མཐོ་སར་འགྱོ་མི་ཚུ་ལུ་ ལ་སྡུག་ཡང་མ་ཐོབ་པའི་ཁེ་ཕན་ཡོདཔ་ཨིན་མས།

ཧེ་མའི་དུས་ལུ་འབད་ཅིན་ ཕར་ཚུར་འགྲོ་འགྲུལ་འབད་བའི་སྐབས་ ད་རེས་ནང་པ་བཟུམ་སྦེ་ སྣུམ་འཁོར་གྱི་ལམ་དང་སྣུམ་འཁོར་ཚུ་མེད་ནི་འདི་གིས་ མང་ཤོས་རང་ རྐང་སྟོང་སྦེ་འགྱོ་དགོཔ་ད་ ལམ་ཁར་བཞེས་སྒོའི་རིགས་ག་ནི་ཡང་འཐོབ་ཐབས་མེདཔ་ལས་ ལྟོ་མི་བཀྱེས་ནིའི་དོན་ལུ་སྤྱོད་སྲོལ་ཡོད་རུང་ ད་རེས་ནངས་པ་ དེ་བཟུམ་མའི་དཀའ་ངལ་ཚུ་མེདཔ་ལས་ གནམ་བྱཱར་གྱི་དུས་ལུ་ ལ་ཁ་ལུ་དབྱར་རྩ་དགུན་འབུཔ་འཐུ་བར་འགྱོ་མི་རེ་རེ་གཉིས་གཉིས་ཀྱིས་ ལ་ཁར་ལ་སྡུག་མི་འཐོབ་ནི་དང་ ལྟོ་བཀྱེསཔ་བསང་ནིའི་དོན་ལུ་ ཨ་ཙི་རེ་ལག་ལེན་འཐབ་མ་གཏོགས་ ཡོངས་གྲགས་སྦེ་སྤྱོད་སྲོལ་མེད་ནི་དེ་གིས་ ཉམས་འགྱོ་ནིའི་ཉེན་ཁ་སྦོམ་འདུག་ཟེར་བསམ་འཆར་བཤད་ནི་འདུག། ལག་ཟས་ཀེབ་ཏང་འདི་ དུས་རྒྱུན་དུ་ཟ་སྤྱོད་འབད་སྲོལ་མེད་པའི་ཁར་ སྤྲོ་ཟས་དང་ མཆོད་པའི་ཟས་སྦེ་ ཚོགས་ལ་སོགས་པ་ཚུ་ནང་ཡང་ ལག་ལེན་འཐབ་སྲོལ་མེདཔ་ཨིན་མས།

ལག་ཟས་ཀེབ་ཐང་འདི་གིས་ བུམ་རྫོང་ཁག་གི་གཡུས་ཚན་ཚུ་གི་ངོ་སྟོན་འབདཝ་ཨིན་མས། དུས་རྒྱུན་གྱི་བཞེས་སྒོའི་སྣ་ཁ་སྦེ་ཟ་སྤྱོད་འབད་སྲོལ་མེད་པའི་ཁར་ སྤྲོ་ཟས་དང་ ཟས་རྡིག་རྡིགམ་ ཚོགས་རྫས་ ལ་སོགས་པ་ཚུ་གི་དོན་ལུ་ཡང་ལག་ལེན་འཐབ་སྲོལ་མེད་རུང་ ལམ་འགྲུལ་པ་ཚུ་དང་ ས་ཁ་མཐོ་སར་འགྱོ་མི་ཚུ་གི་ལྟོ་གི་དུས་ཚོད་མ་རན་པའི་བར་ན་དང་ ལ་སྡུག་མི་འཐོབ་ནིའི་དོན་ལུ་ལག་ལེན་འཐབ་ཨིན་མས།

ལག་ཟས་ཀེབ་ཏང་འདི་ གཡུས་སྒོ་འདི་ནང་ དུས་དང་ཕུ་ལས་ར་ མི་རབས་ལས་མི་རབས་བརྒྱུད་དེ་ ཟ་སྤྱོད་འབད་དེ་འོང་བའི་བཞེས་སྒོ་གཙོ་བོ་ཅིག་ཨིན་པའི་ཁར་ ཨཔ་བླམ་མགོན་པོ་དང་ ཨམ་བཀྲིས་གཉིས་ལས་བརྒྱུད་པའི་བུ་ ཡེ་ཤེས་དཔལ་འབྱོར་དང་ ཨཔ་རྟ་པོ་དང་ཨམ་བཀྲིས་མོ་གཉིས་ལས་བརྒྱུད་པའི་བུམོ་ ཅིང་མོ་གཉིས་ལས་ ད་རེས་ སྐྱེས་ལོ་ ༥༣ ལང་མི་ཨམ་ཤེས་རབ་སྒྲོལ་མ་གིས་ མོ་ར་ཆུང་ཀུ་སྦེ་སྡོད་པའི་བསྒང་ལས་ར་ ཁུར་བཱ་་བཟོ་ནིའི་རྒྱུ་གཙོ་བོ་ བྱཱོ་དང་ རྒྱ་རེད་ཚུ་ཞིང་ཁར་སོན་བཏབ་ནིའི་དུས་ཚོད་དང་ བསྡུ་ཐངས་ཀྱི་ལག་ལེན་གྱི་རིམ་པ་ཚུ་ མོ་རའི་ཕམ་ཚུ་ལས་ མ་བཏུབ་བཏུབ་སྦེ་ལྷབ་སྦྱང་འབད་དེ་ཡོད་པའི་ཁར་ མོ་རའི་བུམོ་ སྐྱེས་ལོ་ ༣༥ ལང་མི་ སྒྲོལ་དཀར་ལུ་ཡང་ དེའི་ལག་ལེན་དང་སྦྱང་བ་ཚུ་ ལེགས་ཤོམ་སྦེ་བྱིན་ནུག།

འབྲུ་སྣ་དགུའི་གྲལ་ལས་ བྱཱོ་བཏབ་ནིའི་དུས་ཚོད་འདི་ རང་ཟླ་ ༣ པའི་ནང་བྱ་ཁུ་བྱུག་ལྷོདཔ་ད་དང་ ཡང་ཅིན་ལུང་པ་འདི་ནང་ཡོད་པའི་ཤིང་འབྲས་ གཡུས་སྐད་ལས་ གླི་ཕཱན་ཟེར་མི་(crab apple) གི་མེ་ཏོག་ཤར་བའི་དུས་དང་འཁྲིལ་ བཏབ་ཞིནམ་ལས་ རང་ཟླ་ ༦ པའི་ནང་བསྡུཝ་ཨིན་པས། ཁུར་བཱ་འདི་ བྱཱོ་དང་རྒྱ་རེད་གཉིས་ཆ་ར་གིས་ བཟོཝ་ཨིན་རུང་ བྱཱོ་ལས་བཟོ་མི་འདི་ཁག་ཏེག་འཚམས་ཅིག་དང་ རྒྱ་རེད་ལས་བཟོ་མི་འདི་མངརམ་འཚམས་ཅིག་འོངམ་ཨིན་མས།

ལོ་ཐོག་རྒྱ་རེད་འདི་ ཟླཝ་ ༥ པའི་ནང་ ལུང་ཕྱོགས་འདི་ནང་ ཁྱབ་ཆེ་དྲགས་ཡོད་པའི་ ཨོ་ལའི་ཕྱུ་གུ་ཚུ་ ཚང་ནང་ལས་ཐོན་ཏེ་ ཕྱི་ཁར་འཁྱམས་པའི་དུས་ཚོད་དང་འཁྲིལ་ཏེ་ བཏབ་སྲོལ་ཡོདཔ་ཨིན་མས། དེ་ཡང་ བར་ན་ཞག་གྲངས་ ༡༥ རེ་སྦེ་ དུས་རིམ་གསུམ་སྦེ་བརྩིས་སྲོལ་ཡོད་མི་འདི་ཡང་ དང་པ་དང་ གཉིས་པ་ གསུམ་པ་ཟེར་བརྩིས་སྲོལ་ཡོད་མིའི་གྲལ་ལས་ དང་པ་དང་ གསུམ་པའི་ནང་ཚུད་པ་ཅིན་ ལོ་ཐོག་ཡང་ལེགས་ཏེ་འབྲས་བུ་ ལེགས་ཤོམ་སྦེ་འཚོཔ་ཨིན་རུང་ དུས་རིམ་གཉིས་པའི་ནང་ཚུད་སོང་པ་ཅིན་ བར་གའིུ་ནང་ཚུད་ནུག་ཟེར་ རྒྱ་རེད་འདི་ མེ་ཏོག་རྐྱངམ་ཅིག་ཤར་ཏེ་ འབྲས་བུ་ལེགས་ཤོམ་སྦེ་མི་ཚོ་ཟེར་ བཤད་སྲོལ་ཡང་འདུག། དེ་ལས་ ཟླཝ་ ༨ པའི་ཟླ་མཇུག་ཁམས་ལུ་བསྡུ་སྟེ་ ཐོག་ཕུད་དང་པ་འདི་ རྒེད་འོག་འདི་ནང་ཡོད་པའི་ ཐང་སྦི་ལྷ་ཁང་གི་ཚེས་བཅུའི་སྐབས་ལུ་ ཁུར་བཱ་དང་པུ་ཏ་ ཇང་བུ་ལི་ལ་སོགས་པ་བཟོ་སྟེ་ ཚོགས་སྦེ་ཕུལ་སྲོལ་ཡོདཔ་ཨིན་མས།

ལག་ཟས་ཀེབ་ཐང་འདི་གིས་ བུམ་རྫོང་ཁག་གི་གཡུས་ཚན་ཚུ་གི་ངོ་སྟོན་འབདཝ་ཨིན་མས། དུས་རྒྱུན་གྱི་བཞེས་སྒོའི་སྣ་ཁ་སྦེ་ཟ་སྤྱོད་འབད་སྲོལ་མེད་པའི་ཁར་ སྤྲོ་ཟས་དང་ ཟས་རྡིག་རྡིགམ་ ཚོགས་རྫས་ ལ་སོགས་པ་ཚུ་གི་དོན་ལུ་ཡང་ལག་ལེན་འཐབ་སྲོལ་མེད་རུང་ ལམ་འགྲུལ་པ་ཚུ་དང་ ས་ཁ་མཐོ་སར་འགྱོ་མི་ཚུ་གི་ལྟོ་གི་དུས་ཚོད་མ་རན་པའི་བར་ན་དང་ ལ་སྡུག་མི་འཐོབ་ནིའི་དོན་ལུ་ལག་ལེན་འཐབ་ཨིན་མས།

ལག་ཟས་ཀེབ་ཏང་བཟོ་བའི་སྐབས་ལུ་ དགོས་མཁོའི་ཅ་ཆས་དང་རྫས་སྦྱོར།
- བྱཱོ་ཕྱེ།/རྒྱ་རེད་ཕྱེ།
- བ་མར།
- གུ་རམ།
- ཆང་།
- གསིག་མ། ཕྱེ་གསིག་ནིའི་དོན་ལུ་དགོཔ་ཨིན།
- ཟངས་གཞོང་། ཕྱེ་བསྣད་ནིའི་དོན་ལུ་དགོཔ་ཨིན།
- ཀ་ལ། ཆུ་ཚན་བཀོལ་ཞིནམ་ལས་ ལག་ཟས་ཀེབ་ཏང་བཙོ་ནི་གི་དོན་ལུ་དགོཔ་ཨིན།
- ཐབ། ལག་ཟས་ཀེབ་ཏང་མེ་གཏང་ནིའི་དོན་ལུ་དགོཔ་ཨིན།
- རྡོ་ཡུག་/ལྕགས་ཡུག ལག་ཟས་ཀེབ་ཏང་བཟོ་ནིའི་དོན་ལུ་དགོཔ་ཨིན།

བུམ་ཐང་པའི་ལག་ཟས་ཀེབ་ཏང་བཟོ་ཐངས།
- རྒྱ་རེད་ཕྱེ་ ཡང་ན་ བྱཱོ་ཕྱེ་ནང་ ཨ་རག་དང་ སུམ་ཆང་ གུ་རམ་ བ་མར་ཚུ་བླུགས་ཏེ་བསྣད།
- ལགཔ་གཉིས་ཀྱིས་ སྟུག་ཚད་ སོར་དོ་དེ་ཅིག་དང་ སྦོམ་ཚད་དར་ཚི་སྒོང་ལས་ སྦོམ་སུ་ཅིག་སྦེ་ ཐད་སྒོར་སྒོ་བཟོ་ཞིནམ་ལས་ རྡོ་ཡུག་གུར་བསྐྱལ་ཞིནམ་ལས་ ལ་ལས་བསྒྱུར་ཡི་ར་དུམ་གྲ་ཅིག་བཞག།
- དེ་ལས་ རྡོར་གུར་ལས་ཕབ་ཞིནམ་ལས་ སྒོ་ཐལ་ནང་བཙུགས་ཏེ་ ཚོཔ་ཅིག་བཏོན་ཞིནམ་ད་ ཆུ་ཚར་ཅིག་བཤལ་ཏེ་ ལྟོ་རས་ནང་སྤུར་སྦེ་བཞགཔ་ཨིན་མས། དེ་སྦེ་འབད་བ་ཅིན་ ཟཝ་ད་སྦོང་ཆི་ཆི་འོངམ་ཨིན་ཟེར་བཤད་ནི་འདུག།
ལ་ལུ་གིས་ ལག་ཟས་ཀེབ་ཏང་འདི་ སྦུག་ནང་ལས་དོང་བཏོན་ཏེ་ ལག་པའི་རྡོབ་ཅུང་བཟུམ་སྦེ་བཟོ་ཞིནམ་ལས་ ཆུ་ཚན་ནང་བཙོཝ་ཨིནམ་མ་ཚད་ ལ་ལུ་གིས་ རླངམ་གདུག་རྐྱབ་སྟེ་གིས་སྦེ་ཡང་བཟོཝ་ཨིན་མས།

ལྕང་བ་གཡུས་ཚན་ནང་ལུ་ ཁྱིམ་གུང་གྲངས་ ༡༣ དེ་ཅིག་ ཕུན་སུམ་ཚོགས་ཏོག་ཏོ་སྦེ་ཆགས་ཏེ་ཡོད་པའི་ཁར་ འཚོ་བ་གཙོ་བོ་སོ་ནམ་ཞིང་ལཱ་ལུ་བརྟེན་ཏེ་སྡོད་པའི་ཁར་ དངུལ་ཐོག་གཙོ་བོ་འདི་ ཀེ་བ་འདི་རང་ཨིན་རུང་ ལོ་ངོ་དག་པ་ཅིག་གི་ཧེ་མ་ལས་ གཞུང་ཞབས་ལས་ དབྱར་རྩ་དགུན་འབུཔ་འཐུ་སྟེེ་ ཚོང་འབྲེལ་འཐབ་ནིའི་གནང་བ་གནང་ཞིནམ་ལས་ དངུལ་གྱི་འོང་འབབ་དང་མི་ཚེ་འཚོ་སྐྱོང་ལུ་ ཁེ་ཕན་གནམ་སེད་ས་མེད་ཐོབ་སྟེ་ཡོདཔ་ལས་ འཚོ་བའི་གནས་སྟངས་ཡང་འགྱུར་བཅོས་སྦོམ་སོང་སྟེ་འདུག།


ཞིབ་འཚོལ་འབད་མི། ཚེ་རིང་དཔལ་འབྱོར། སྒྲིག་སློབ་གཙོ་འཛིན་འོགམ།