ང་བཅས་རའི་ འབྲུག་རྒྱལ་ཁབ་ནང་ལས་འཐོན་པའི་ འབྲུ་སྣ་དགུའི་གྲལ་ལས་ རྗེན་འཐག་ཕྱེ་ཟེར་ ཀར་མ་བརྔོ་བར་ཕྱེ་འཐག་སྟེ་ བཟོ་བའི་ཇང་བུ་ལི་འདི་ དུས་དང་ཕུག་ལས་རང་ བུམ་ཐང་སྡེ་བཞིའི་རྒེད་འོག་ཚུ་ནང་ བཞེས་སྒོ་ཚུ་ལས་གཙོ་ཅན་དང་ ཁག་ཆེ་ཤོས་ཅིག་སྦེ་ མི་རབས་ལས་མི་རབས་བརྒྱུད་དེ་ ལག་ལེན་འཐབ་སྟེ་སྡོད་ནུག། དེ་ལུ་ བུམ་ཐང་པའི་ངག་གཤིས་ནང་ལས་འབད་བ་ཅིན་ བྱང་བུ་ལི་དང་ ཡང་ཅིན་ བྱང་བ་ལི་ཟེར་སླབ་ཨིན་རུང་ གཏེར་སྟོན་པདྨ གླིང་པའི་རྣམ་ཐར་ནང་ལུ་ཨིན་པ་ཅིན་ བྱང་བུ་ལེབ་ཟེར་བཀོད་དེ་འདུག། དེ་ཡང་ དང་ཕུ་བུམ་ཐང་གི་ལུང་ཕྱོགས་འདི་ནང་ རེད་ཚུ་རྩ་ལས་མ་ཚོཔ་ལས་ ཆུམ་གྱི་རིགས་ ཐོབ་པར་ལཱ་ཁག་ཡོད་ནི་དེ་གིས་ ལྟོ་ཟ་ནི་འདི་ ག་ནི་བ་དཀོན་དྲགས་ཅིག་ཨིན་མས། ལྟོ་འདི་ཟ་སྤྱོད་འབད་ནི་འདི་ ལོ་གསར་དང་དུས་སྟོན་ཚུ་གི་སྐབས་ལུ་ མི་འབྱོར་པ་ཅན་ཚུ་གིས་ རྐྱངམ་གཅིག་མ་གཏོགས་ སྤྱིར་བཏང་ག་ར་གིས་ ཟ་ཚུགས་པར་ལཱ་ཁག་ཡོད་ཟེར་བཤདཔ་ཨིན་པས།

དེ་འབདཝ་ད་ ད་རེས་ནངས་པ་ རྫོང་ཁག་དེ་ནང་གི་རྒེད་འོག་དང་ གཡུས་སྒོ་ག་རའི་ནང་ མི་སེར་ཆེ་འབྲིང་ཆུང་གསུམ་ག་ར་དང་ ཐ་ན་ ལ་གུང་གསུམ་གྱི་མི་སེར་ཚུ་གིས་ཡང་ ཆུམ་རིགས་ཀྱི་ལྟོ་ལུ་གཙོ་བོར་བཏོན་ཏེ་སྡོདཔ་མ་གཏོགས་ ཕྱེའི་རིགས་ལས་བཟོ་བའི་ ཁུར་བཱ། བྱང་བུ་ལི་དང་པུ་ཏ་ལ་སོགས་པ་ཚུ་ ཟ་སྤྱོད་འབད་མི་གངམ་མེདཔ་ལས་ དུས་རིམ་བཞིན་དུ་ ཉམས་འགྱོ་ནིའི་དུམ་ཁ་ལྷོད་དེ་ཡོདཔ་ལས་ ད་རེས་ ཟ་འདོད་ཡོད་མི་ཚུ་གིས་དམིགས་གསལ་སྦེ་ མགྱོན་ཚུ་བྱོནམ་དང་ དེ་ལས་ དུས་སྟོན་ཚུ་གི་སྐབས་དང་ དེ་མེན་པ་ཅིན་ མཁོ་མངགས་ལོགས་སུ་སྦེ་འབད་དེ་མ་གཏོགས་ བཞེས་སྒོ་གཞན་ཚུ་བཟུམ་སྦེ་ དུས་རྒྱུན་ཐོབ་ཆོག་ཆོག་དང་ཟ་ཆོག་ཆོག་མེདཔ་ཨིན་པས།

བྱང་བུ་ལི་བཟོ་ནི་འདི་ ཧེ་མའི་དུས་ལུ་འབད་བ་ཅིན་ ཀེབ་ཏ་སྦེ་བསྒྲིལ་ཞིནམ་ལས་ སྦོམ་ཆུང་སོར་གང་རེ་དང་ རིང་ཐུང་ལག་གང་རེ་གི་རྩིས་བཏོགས་ཏེ་ བཟོཝ་ཨིན་རུང་ ད་རེས་ནངས་པ་ འཕྲུལ་ཆས་ཚུ་ལག་ལེན་འཐབ་སྟེ་ བཟོ་ནིའི་སྲོལ་ཡང་དར་ཏེ་འདུག། ཇང་བུ་ལི་འདི་ དུས་རྒྱུན་དུ་ཟ་སྤྱོད་འབད་སྲོལ་མེད་རུང་ འཕྲལ་འཕྲལ་སྦེ་ བཞེས་སྒོ་ཁ་སོར་ཏེ་ཟ་བའི་ཁར་ སྤྲོ་ཟས་དང་བཞེས་སྒོ་སྣ་མང་གི་གྲངས་སུ་བཙུགས་ཏེ་ སྤྱོད་སྲོལ་ཡང་ཡོདཔ་ཨིན་མས།

བྱང་བུ་ལི་འདི་གིས་ བུམ་ཐང་རྫོང་ཁག་གི་གཡུས་ཚན་ཚུ་གི་ངོ་སྟོན་འབདཝ་ཨིནམ་མ་ཚད་ ཧེ་མའི་དུས་ལུ་དུས་རྒྱུན་གྱི་བཞེས་སྒོ་སྦེ་ ཟ་སྤྱོད་འབདཝ་ཨིན་རུང་ ད་རེས་ནངས་པ་ འཕྲལ་འཕྲལ་སྐབས་ བཞེས་སྒོའི་སྣ་ཁ་སྦེ་ཟ་སྤྱོད་འབད་བའི་ཁར་ སྤྲོ་ཟས་དང་ ཟས་རྡིག་རྡིགམ་ ཚོགས་རྫས་ ལ་སོགས་པ་ཚུ་གི་དོན་ལུ་ཡང་ལག་ལེན་འཐབ་ཨིན་མས།

གཡུས་སྒོ་འདི་ནང་ བྱང་བུ་ལི་ལག་ལེན་དང་ཟ་སྤྱོད་འདི་ དུས་དང་ཕུ་ལས་ར་ མི་རབས་ལས་མི་རབས་བརྒྱུད་དེ་ ཟ་སྤྱོད་འབད་དེ་འོང་བའི་བཞེས་སྒོ་གཙོ་བོ་ཅིག་ཨིན་པའི་ཁར་ ཨཔ་བླམ་མགོན་པོ་དང་ ཨམ་བཀྲིས་གཉིས་ལས་བརྒྱུད་པའི་བུ་ ཡེ་ཤེས་དཔལ་འབྱོར་དང་ ཨཔ་རྟ་པོ་དང་ཨམ་བཀྲིས་མོ་གཉིས་ལས་བརྒྱུད་པའི་བུམོ་ ཅིང་མོ་གཉིས་ལས་ ད་རེས་ སྐྱེས་ལོ་ ༥༣ ལང་མི་ཨམ་ཤེས་རབ་སྒྲོལ་མ་གིས་ མོ་ར་ཆུང་ཀུ་སྦེ་སྡོད་པའི་བསྒང་ལས་ར་ ཇང་བུ་ལི་བཟོ་ནིའི་རྒྱུ་གཙོ་བོ་ ཀར་འདི་ཞིང་ཁར་སོན་བཏབ་ནིའི་དུས་ཚོད་དང་ བསྡུ་ཐངས་ཀྱི་ལག་ལེན་གྱི་རིམ་པ་ཚུ་ མོ་རའི་ཕམ་ཚུ་ལས་ མ་བཏུབ་བཏུབ་སྦེ་ལྷབ་སྦྱང་འབད་དེ་ཡོད་པའི་ཁར་ མོ་རའི་བུམོ་ སྐྱེས་ལོ་ ༣༥ ལང་མི་ སྒྲོལ་དཀར་ལུ་ཡང་ དེའི་ལག་ལེན་དང་སྦྱང་བ་་ཚུ་ ལེགས་ཤོམ་སྦེ་བྱིན་ཏེ་ ད་རེས་ཁྱིམ་ནང་མགྱོནམོ་ཆེ་འབྲིང་ཆུང་གསུམ་ག་བྱོན་རུང་ བུམ་ཐང་པའི་རང་ལུགས་ཀྱི་བཞེས་སྒོ་ཚུ་ དུས་ནམ་དང་ནམ་ར་དགོ་རུང་ བཟོ་སྟེ་དྲང་ཆོག་ཆོག་སྦེ་སྡོདཔ་ཨིན་མས།

བྱང་བུ་བཟོ་བའི་སྐབས་ལུ་ དགོས་མཁོའི་ཅ་ཆས་རྫས་སྦྱོར།
- རྗེན་འཐག་ཕྱེ།
- ཨེ་ཕྱེ།
- རམ་/དུང་སྒོགཔ།
- མར།
- སྒོང་རྡོག།
- གསིག་མ། ཕྱེ་གསིག་ནིའི་དོན་ལུ་དགོཔ་ཨིན།
- ཟངས་གཞོང་། ཕྱེ་བསྣད་ནིའི་དོན་ལུ་དགོཔ་ཨིན།
- ཨེན་ཅུ་དང་སྒྲིལ་ཤིང་། ཕྱེ་བསྣད་མི་འདི་ ཀེབ་ཏང་སྒྲིལ་ནིའི་དོན་ལུ་དགོཔ་ཨིན།
- ཀ་ཀྲ་ལ། ཀེབ་ཏང་སྒྲིལ་མི་འདི་ ཇང་བུ་ལི་གི་ཚད་གཞི་ཁར་བཏོག་ནིའི་དོན་ལུ་དགོཔ་ཨིན།
- ཐབ། ཇང་བུ་ལི་བཙོ་ནིའི་དོན་ལུ་དགོཔ་ཨིན།
- ཆུ་ཚན། ཇང་བུ་ལི་ཤུར་ནིའི་དོན་ལུ་དགོཔ་ཨིན།
- དཀྲུགས་ཤིང་། ཇང་བུ་ལི་ དཀྲུགས་ནིའི་དོན་ལུ་དགོཔ་ཨིན།
- ཤོ་ད་ལི།༼ཇ་བཙག་༽ ཆུ་ཚན་ནང་ལས་བཏོན་ཏེ་ ཆུ་ཁྱོལམ་ནང་སྦངམ་ད་ལག་ལེན་འཐབ་ཨིན།

བྱང་བུ་ལི་བཟོ་ཐངས་འདི་ཡང་གཤམ་གསལ་ལྟར་དུ་ཨིན།
- རྗེན་འཐག་ཕྱེ་བསྣད་དེ་ ཀེབ་ཏ་སྒྲིལ་ཞིནམ་ལས་ རྒྱ་གཞི་སོར་གང་གི་རྩིས་དྲ་སྟེ་ ཆུ་ཚན་ནང་བླུག་ནི།
- ཆུ་ཚན་ནང་ བཤུར་ཞིནམ་ལས་ ལོག་ཆུ་འཁོལམ་ནང་སྦང་སྟེ་བཏོན་དགོ།
- ཚྭ། ཨེ་ཕྱེ། ཐིང་ངེ། དང་ རམ་/དུང་སྒོགཔ་གང་རུང་ བརྫམ་སྟེ་བླུག་དགོ།
- མར་ཁུ་བཙག་བཅད་དེ་བླུགས་ཞིནམ་ལས་ ལེགས་ཤོམ་སྦེ་སྒྱེས་ཏེ་ཟཝ་ཨིན།

ལྕང་བ་གཡུས་ཚན་ནང་ལུ་ ཁྱིམ་གུང་གྲངས་ ༡༣ དེ་ཅིག་ ཕུན་སུམ་ཚོགས་ཏོག་ཏོ་སྦེ་ཆགས་ཏེ་ཡོད་པའི་ཁར་ འཚོ་བ་གཙོ་བོ་སོ་ནམ་ཞིང་ལཱ་ལུ་བརྟེན་ཏེ་སྡོད་པའི་ཁར་ དངུལ་ཐོག་གཙོ་བོ་འདི་ ཀེ་བ་འདི་རང་ཨིན་རུང་ ལོ་ངོ་དག་པ་ཅིག་གི་ཧེ་མ་ལས་ གཞུང་ཞབས་ལས་ དབྱར་རྩ་དགུན་འབུཔ་འཐུ་སྟེེ་ ཚོང་འབྲེལ་འཐབ་ནིའི་གནང་བ་གནང་ཞིནམ་ལས་ དངུལ་གྱི་འོང་འབབ་དང་མི་ཚེ་འཚོ་སྐྱོང་ལུ་ ཁེ་ཕན་གནམ་སེད་ས་མེད་ཐོབ་སྟེ་ཡོདཔ་ལས་ འཚོ་བའི་གནས་སྟངས་ཡང་འགྱུར་བཅོས་སྦོམ་སོང་སྟེ་འདུག།

ཞིབ་འཚོལ་འབད་མི། ཚེ་རིང་དཔལ་འབྱོར། སྒྲིག་སློབ་གཙོ་འཛིན་འོགམ།