ལྷ་བོན་ཡང་ཅིན་ ལྷ་འབོད་ཟེར་མི་འདི་ ཀྲོང་གསར་རྫོང་ཁག་ བྲག་སྟེང་རྒེད་འོག་གི་ སྟག་རྩེ་དང་གཡུས་ས་གཡུས་ཚན་ཚུ་ནང་ལུ་ འགོ་འདྲེན་འཐབ་དུས་སྟོན་ཁྱད་དུ་འཕགས་པ་ཅིག་ཨིན། མིང་གནས་ཀྱི་འགྲེལ་བཤད་ཡང་ ལྷ་ཟེར་བ་ཅིན་ སྲུང་མ་ལུ་གོ་ནི་དང་ བོན་ཟེར་བ་ཅིན་ བོན་པོའི་ཆོས་ལུགས་ལུ་གོ་སྲོལ་དང་ དེ་ལས་ འབོད་ཟེར་བའི་མིང་ཚིག་གིས་འབོ་པའི་དོན་དང་ དེ་ལྷ་ལུ་སྦྱར་ཏེ་གོ་དོན་འགྲེལ་བ་ཅིན་ ལྷ་འབོ་ནི་དང་ཞུ་བའི་དོན་ཨིན་མས། ལྷ་བོན་དུས་སྟོན་གྱི་སྐབས་ལུ་ གཡུས་ཁའི་མི་ཚུ་གིས་ ཡུལ་གྱི་གཞི་བདག་ ཡུལ་བཙན་རྡོ་རྗེ་བྲག་བཙན་དང་ སྨན་མོ་བཀྲ་ཤིས་དབང་འཛོམས། དེ་ལས་ བོན་ལུགས་ཀྱི་ལྷ་ཆེན་འོ་དེ་གུང་རྒྱལ་ཚུ་ ལྷ་ཞུ་སའི་ས་སྒོ་ནང་སྦེ་ གནས་སྐབས་ཀྱི་དོན་ལུ་བཅའ་བསྒྲིགས་རྐྱབ་ཡོད་པའི་ ལྷ་ཁྱིམ་ནང་ལུ་ཞུཝ་ཨིན་མས། དེ་ནང་ལུ་གདན་འདྲེན་ཞུ་ཞིནམ་ལས་ མི་ཚུ་གིས་ད་ཚུན་གྱི་རིང་ལུ་ སྒེར་རྐྱང་རང་གི་མཐའ་དོན་ལུ་ ཉིན་གྱི་བྱ་ར། མཚན་མོའི་སྐྱབས་དང་སྡོང་གྲོགས་མཛད་གནང་མི་དང་ དུས་རྒྱུན་གྱི་བྱ་བ་ལམ་འགྲོ་ཚུ་ནང་ ལམ་སྟོན་མཛད་གནང་མི་ལུ་བཀའ་དྲིན་དགའ་ཚོར་ཞུ་ནི་དང་ དེ་མ་ཚད་ སྤྱིར་བཏང་གཡུས་ཚན་ནང་ལུ་ཨུན་པ་ཅིན་ ལོ་ཕྱུགས་རྟག་ཏུ་ལེགས། ཆར་ཆུ་དུས་སུ་བབས། ནད་ཡམས། མུ་གེ། རྒོད་ཁ་ལ་སོགས་པའི་བཀྲ་མ་ཤིས་པ་ཚུ་ཞི་སྟེ་ ཕུན་སུམ་ཚོགས་པའི་ངང་ལུ་གནས་བཅུག་མི་ལུ་ གཡུས་མི་ག་ར་གིས་མགྲིན་གཅིག་དབྱངས་གཅིག་གི་སྒོ་ལས་ བཀའ་དྲིན་དགའ་ཚོར་གྱི་གཏང་རག་ཕུལ་བའི་ཚུལ་ཨིན་མས།

དུས་སྟོན་འདི་ ལོ་བསྟར་བཞིན་དུ་ ཉིནམ་གསུམ་གྱི་རིང་ལུ་ གསོལ་མཆོད་ཕུལ་ནིའི་ལས་རིམ་ཁྱད་པར་ཅན་ཅིག་སྦེ་ བརྩི་སྲུང་ཞུ་དོ་ཡོདཔ་དང་ དེའི་སྐབས་ལུ་ གཡུས་མི་དྲག་ཞན་བར་གསུམ་མེད་པར་ཆ་མཉམ་འཛོམས་ཏེ་ དོ་རུང་ད་ལས་ཕར་ཡང་ མི་ལུ་ན་ཚ། སྒོ་ནོར་སེམས་ཅན་ཚུ་ལུ་རྒོད་ཁ། ལོ་ཐོག་ཚུ་ལུ་ནད་ཡམས་དང་ སྤྱིར་སེམས་ཅན་ཚུ་ལུ་མུ་གེ་འབྱུང་མི་བཅུག་ནིའི་ སྨོན་བཏབ་ནིའི་དུས་ཚོད་བཟང་པོ་ཅིག་ཨིན་མས། དུས་སྟོན་གི་སྐབས་ལུ་ འགན་ཁུར་གཙོ་བོ་འབག་མི་འདི་ གཡུས་མི་རྒས་ཤོས་ཅིག་ཨིན་མི་ ཕ་ཇོ་ཟེར་མི་དང་ དེ་ལུ་ཆ་རོགས་འབད་མི་དཔའ་མཛངས་པ་ ན་གཞོན་ཕོ་རྒྱའི་རིགས་ཚུ་ཨིནམ་མ་ཚད་ ཨམ་སྲུ་ཚུ་གིས་ཡང་ གླུ་དང་གར་གྱི་མཆོད་པ་ཚུ་ཕུལ་ནིའི་དོན་ལུ་ གྲལ་ཁར་གཏོགས་ཏེ་ དགའ་སྤྲོ་སྟོན་ནིའི་དུས་ཚོད་ཅིག་ཡང་ཨིན་མས། དང་ཕུ་ཨིན་པ་ཅིན་ ལྷ་འབོད་ཀྱི་སྐབས་ལུ་ ནོར་སེམས་ཅན་ཚུ་དམར་བསད་འབད་དེ་ ཤ་དང་ཁྲག་གིས་མཆོད་པ་ཕུལ་སྲོལ་ཡོད་རུང་ སྲོལ་ངན་དེ་ ལོ་མང་རབས་ཅིག་གི་ཧེ་མ་ལས་ཤོལ་བཞག་སྟེ་ ད་རེས་ནངས་པ་འབད་བ་ཅིན་ ཤ་ཁང་ནང་ལས་ཤ་ཉོ་སྟེ་ གསོལ་མཆོད་པ་ཕུལ་སྲོལ་ཡོདཔ་ཨིན་མས།

ལྷ་འབོད་འདི་ གཡུས་ཚན་གཉིས་ནང་ ཉིནམ་གསུམ་གྱི་རིང་ལུ་བརྩི་སྲུང་ཞུཝ་ཨིན་མས། དེ་སྦེ་ འགོ་འདྲེན་འཐབ་དགོ་པའི་དགོས་དོན་ཡང་ གཡུས་ཚན་ནང་ལུ་ཁ་རྗེ་དང་བསོད་ནམས་རྒྱས་ཏེ་ མི་ནོར་སེམས་ཅན་ཚུ་ག་ར་ ཞི་བདེའི་ངང་ལུ་མཐུན་ཏོག་ཏོ་སྦེ་གནས་ནི་དང་ བསམ་པའི་དོན་ཚུ་ཡང་འགྲུབ་པའི་རེ་འདོད་བཅས་ཨིན་མས། དུས་སྟོན་གྱི་སྐབས་ལུ་ ཁྱིམ་གུང་རེ་ལས་ ན་གཞོན་དཔའ་རྩལ་ཅན་ཚུ་གིས་ ཆུ་ཚོད་བཞི་དེ་ཅིག་འགྱོ་དགོ་པའི་ས་ཁར་ ལྷ་ཞུ་སའི་ས་སྒོ་ནང་ལུ་འགྱོ་ཞིནམ་ལས་ བསང་དང་གསེར་སྐྱེམས་ཚུ་ཕུལ་ཏེ་ གླུ་དང་གཞས་ཚུ་གི་མཆོད་པ་ཕུལ་བའི་ཐོག་ལས་ ལྷ་གཡུས་ཁ་ལུ་གདན་འདྲེན་ཞུཝ་ཨིན་མས། དུས་སྟོན་དེ་གིས་ སྐྱབས་དང་སྡོང་གྲོགས་མཛད་མི་ལྷ་ལུ་ གསོལ་མཆོད་དང་གཏང་རག་ཕུལ་ནི་རྐྱངམ་གཅིག་གིས་མ་དོ་བར་ གཡུས་མི་ཚུ་སོ་ནམ་ལཱ་ཚུ་གིས་ལུས་དང་སེམས་ གདུང་སྟེ་སྡོད་མི་ཚུ་ལུ་ ངལ་འཚོ། ཞིམ་པའི་ཟས་ཟ། དགའ་བའི་གླུ་ལེན། སྐྱིད་པའི་བྲོ་འཁྲབ། མཉམ་གཅིག་དགའ་སྤྲོའི་ཉམས་སྟོན་ནིའི་དུས་ཚོད་ དཀོན་དྲག་ཅན་ཅིག་དང་ མི་སྡེ་ངོ་རྐྱང་ཚུ་གི་བར་ན་ མཐུན་ལམ་བཟོ་སྟེ་ གཅིག་སྒྲིལ་དང་གཅིག་མཐུན་གྱི་སྲོལ་བཟང་བཏོད་ནིའི་ བསྐལ་བཟང་གི་དུས་ཚོད་ཅིག་ཡང་ཨིན་མས།

དུན་སྟོན་དེ་གི་སྐབས་ལུ་ གཡུས་མི་རྒས་གཞོན་བར་གསུམ་ཆ་མཉམ་གྱིས་བཅའ་མར་གཏོགས་ཏེ་ ཐུན་མོང་མ་ཡིན་པའི་ལམ་ ལུགས་སྲོལ་ཚུ་ མི་ཉམས་རྒྱུན་སྐྱོང་དང་ སྲུང་སྐྱོབས་འབདཝ་ཨིན་རུང་ ད་ལྟོ་ འགན་ཁུར་གཙོ་བོ་ཅིག་སྦེ་བསྣམས་མི་ ཕ་ཇོའི་ཤེས་བྱ་དང་ཡོན་ཏན། ཉམས་མྱོང་ཚུ་ག་ར་ཁ་རྒྱུན་དང་རྣ་རྒྱུན་ཐོག་ལུ་འབདཝ་ལས་ དེ་ཚུ་ གཞོན་སྐྱེས་ཚུ་གིས་ ལྷབ་སྦྱང་འབད་དེ་མ་བཞག་པ་ཅིན་ ཕ་ཇོའི་རྒྱུན་ཉམས་སོང་པའི་བསྒང་ལས་ སྲོལ་རྒྱུན་འདི་ངམ་ངམ་ཤུགས་ཀྱིས་ཡལ་ནིའི་ཉེན་ཁ་ཡོདཔ་ཨིན་མས།

ལྷ་གསོལ་གྱི་སྐབས་ལུ་ སྟག་རྩེ་དང་གཡུས་ས་གཡུས་ཚན་གྱི་མི་སེར་ ཆ་མཉམ་གཅིག་ཁར་འཛོམས་ དགའ་སྤྲོའི་སྒོ་ལས་ བཀའ་དྲིན་གཏང་རག་ཕུལ་ནིའི་དུས་ཁྱད་པར་ཅན་ཅིག་ཨིནམ་ལས་ ཁྱིམ་གུང་པ་ག་ར་གིས་ ཆུམ། ཨེ་མ། མར། དངུལ་རྐྱང་ཚུ་ག་ར་འདྲ་མཉམ་སྦེ་ ཉིནམ་གསུམ་གྱི་དུས་སྟོན་གྱི་དོན་ལུ་བསྡུ་བླང་འབད་སྲོལ་འདུག། ལྷ་གསོལ་དེ་ཡང་ གཙོ་བོ་ གཡུས་སྐད་ལས་ ཕ་ཇོ་ཟེར་མི་གིས་ གསོལ་མཆོད་ཕུལ་དོ་ཡོདཔ་ཨིན་རུང་ ཨཔ་ཕ་ཇོ་དེ་ ལོ་རྒས་སྟེ་མེད་པའི་ཤུལ་ལས་ ལུགས་སྲོལ་དེ་ཉམས་འགྱོ་ནི་ཨིན་པའི་ཚ་གྱང་ཚུ་ ད་ལྟོ་ལས་ལངས་ཏེ་ཡོདཔ་སྦེ་བཤད་ཅི།

ཞིབ་འཚོལ་འབད་མི། སྐལ་བཟང་སྒྲོལ་དཀར། སྟག་རྩེ་འབྲིང་རིམ་སླབ་གྲྭ་གོང་མ། བྲག་སྟེང་རྒེད་འོག། ཀྲོང་གསར་རྫོང་ཁག། སྐད་སྒྱུར་ ཡེ་ཤེས་ལྷུན་གྲུབ། འབྲུག་རྒྱལ་ཡོངས་དཔེ་མཛོད་དང་ཡིག་ཆས་གཏན་མཛོད།