རིག་མ་བཅུ་དྲུག་གི་སྐུ་འཆམ་འདི་ ཞི་བའི་གར་འཆམ་ཅིག་འབདཝ་ལས་ དེ་ལུ་མིང་གནས་གཞན་ ཞི་བའི་འཆམ་ཟེར་དང་ དོ་རུང་འཕྲལ་འཕྲལ་སྐབས་ མཁའ་འགྲོ་མའི་འཆམ། རྡོ་རྗེ་ལྷ་མོ་བཅུ་དྲུག་དང་ མཆོད་པའི་ལྷ་མོ་བཅུ་དྲུག་གི་སྐུ་འཆམ་ཟེར་ཡང་ཞུ་སྲོལ་ཡོདཔ་ཨིན། སྤྱིར་བཏང་ལུ་ རིག་མ་བཅུ་དྲུག་གི་སྐུ་འཆམ་ལུ་ རིགས་ཁག་གཉིས་ཡོདཔ་དང་ འདི་ཡང་ སྐུ་འཆམ་གནང་མི་ཚུ་བཙུན་པ་དགེ་སློང་ཚུ་གིས་ སྐུ་གཟུགས་ཀྱི་ཕོད་གོ་དང་ རུས་པའི་རྒྱན་ཆ་བཞེས་ཐངས་ཅོག་འཐད་རུང་ གཅིག་ཕྱག་གཡས་གཡོན་གཉིས་ལུ་ཌ་རུ་དང་དྲིལ་བུ་བསྣམས་ཏེ་ གར་འཆམ་གནང་མི་དང་ གཞན་མི་འདི་ ཕྱག་ལུ་རྔ་དང་རྔས་ཏོག་བསྣམས་ཏེ་གནང་མི་ལུ་ རིག་མ་བཅུ་དྲུག་རྔ་འཆམ་ཟེར་ཞུཝ་ཨིན། མཆོད་པའི་ལྷ་མོ་བཅུ་དྲུག་ཡོད་ས་ལས་ གཙོ་བོ་ལྷ་མོ་བཞི་ཡོདཔ་དང་ དེ་རེ་རེ་ལུ་ཡང་ ཕྱི་ནང་གསང་གསུམ་དེ་ཁོ་ན་ཉིད་ཀྱི་མཆོད་པ་ཕུལ་མི་ ལྷ་མོ་གསུམ་དང་བཞི་གང་འཚམས་སྦེ་བཀལཝ་ད་ གྲངས་བཅུ་དྲུག་ལུ་གྱུརཝ་ཨིན།

འདི་ཡང་ སྒེག་མོ་མ། ཕྲེང་བ་མ། གླུ་མ། གར་མ། འདི་ཕྱིའི་མཆོད་པའི་ལྷ་མོ་བཞི། དེ་བཟུམ་སྦེ་ མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ་ཚུ་ ནང་གི་མཆོད་པའི་ལྷ་མོ་བཞི། པི་ཝང་མ། གླིང་བུ་མ། རྔ་བརྡུང་མ། རྫ་རྔ་མ། གཟུགས་རྡོ་རྗེ་མ་བཅས་ གསང་བའི་མཆོད་པའི་ལྷ་མོ་ལྔ། དེ་ལས་ མཇུག་ར་ རོ་རྡོ་རྗེ་མ། རེག་བྱ་རྡོ་རྗེ་མ། ཆོས་དབྱིངས་རྡོ་རྗེ་མ་གསུམ་འདི་ དེ་ཁོ་ན་ཉིད་ཀྱི་མཆོད་ལྷ་མོ་བཅས་བཅུ་དྲུག་ཨིན།

ཨྱོན་རིན་པོ་ཆེའི་མཛད་པ་དང་འཕྲིན་ལས་ཚུ་ གར་འཆམ་གྱི་གཟུགས་སྦེ་སྟོནམ་ཨིནམ་ལས་ སྐུ་གསུང་ཐུགས་ཀྱི་མཛད་པ་དང་ འཕྲིན་ལས་དངོས་སུ་འགྱུར་བ་མེད་པའི་དད་པ་སྦོམ་བསྐྱེད་དེ་ སངས་རྒྱས་ཀྱི་བསྟན་པའི་ཆོས་སྒོར་ཞུགས་ནི། བསྟན་པ་འཛིན་སྐྱོང་སྤེལ་གསུམ་གྱི་བྱ་བ་ལུ་ གྲལ་གཏོགས་འབད་དེ་ ཚེ་འདི་དང་ཕྱི་མ་ཨ་རྟག་ར་ བདེ་བ་འཐོབ་ཚུགས་པའི་རྒྱུ་ལུ་འགྱུར་བའི་ བྱིན་རླབས་ཅན་གྱི་མཐོང་གྲོལ་གྱི་བྱེ་བྲག་ཅིག་ཨིན།

རིག་མ་བཅུ་དྲུག་གི་སྐུ་འཆམ་འདི་ གུ་རུ་མཚན་བརྒྱད་ཀྱི་སྐུ་འཇམ་གྱི་མཇལ་ཁ་གནང་པའི་སྐབས་ བར་མཚམས་ཁམས་སུ་ མཚན་བརྒྱད་གནང་མི་ཚུ་སྐུ་ངལ་གནང་པའི་སྐབས་ལུ་ མཇལ་ཁ་གནང་སྲོལ་ཡོདཔ་ཨིན། གར་འཆམ་འདི་གནང་པའི་སྐབས་ མཛེས་པའི་རྣམ་འགྱུར་ཚུ་གིས་མ་ཚད་པར་ གསུང་སྙན་པའི་གླུའི་མཆོད་པ་ཡང་ ག་ནི་བ་ཧན་ཏོང་ཏོ་སྦེ་ཕུལ་སྲོལ་ཡོདཔ་ཨིན།

སྐུ་འཆམ་གྱི་ཆས་སྒྲིག་ཐངས་ཡང་
༡་ དབུ་རྒྱན་རིགས་ལྔ་ཅན་མ་ དར་སྣ་ལྔས་བརྒྱན་པ།
༢་ ཕོད་གོ།
༣་ རྡོར་གོང་།
༤་ གྲྭ་ལྷམ།
༥་ རུས་པའི་རྒྱན་དྲུག། སྙན་རྒྱན། མགུལ་རྒྱན། དཔུང་རྒྱན། ཕྱག་གདུབ། ཞབས་གདུབ། སེ་མོ་དོའམ་དོ་ཤལ།

གར་འཆམ་ལྷབ་སྦྱང་གི་འཐད་ལུ་ ལྷབ་སྦྱང་འབད་མིའི་རྒྱུད་ལུ་སྤྲོ་བ་དགོཔ་མ་ཚད་ ལུས་རྩལ་དང་ལྕོགས་གྲུབ་ཡང་དགོཔ་ཨིན། དེ་གུར་ འཆམ་སློབ་ཅིག་བསྟེན་ཏེ་ ལད་སྲོལ་དཔེ་བཤུས་རྐྱབ་སྟེ་ ལག་པའི་ཕྱག་བརྒྱ། རྐང་པའི་སྟངས་སྟབས། ལུས་ཀྱི་མཉེན་བྱ། འཆམ་གྱི་རྩ་ཚིག་དང་ མཆོད་པའི་གླུ་དབྱངས་ཚུ་སེམས་ཁར་ངེས་དགོཔ་ཨིན། དེ་མ་ཚད་ གཞུང་གྲྭ་ཚང་ནང་ལུ་འབད་བ་ཅིན་ གར་ཐིག་དབྱངས་གསུམ་ཟེར་ དུས་རྒྱུན་གྱི་ཆོས་ཡོན་ཏན་ལྷབ་སྦྱང་འབད་ནི་ལས་མ་རྩིས་པར་ ལོགས་སུ་སྦེ་ སྦྱང་དགོ་པའི་ཀུན་ཚང་ཤེས་བྱ་ཅིག་ཨིན།

སྐུ་འཆམ་འདི་ གཙོ་བོ་གྲྭ་ཚང་དང་བཤད་གྲྭ་ནང་ལུ་བཞུགས་མི་ དགེ་སློང་ཚུ་གིས་རྐྱབ་སྲོལ་ཡོད་རུང་ གཡུས་གོ་ལ་ལུ་ཅིག་གི་ནང་ལུ་ དང་ཕུ་གི་ལུགས་སྲོལ་ལྟར་དུ་ བླ་མའི་སྒོམ་ཆེན་དང་གྲྭ་པ། དེ་ལས་ མི་སེར་དཀྱུ་མ་ཚུ་གིས་ཡང་གྲས་ཁར་གཏོགས་ཏེ་ རྐྱབ་སྲོལ་ཡོདཔ་ཨིན།


ཞིབ་འཚོལ་འབད་མི། ཡེ་ཤེས་ལྷུན་གྲུབ། འབྲུག་རྒྱལ་ཡོངས་དཔེ་མཛོད་དང་ཡིག་ཆས་གཏན་མཛོད།