སྦོ་ཡོ་མཛརཝ་ ཟེར་མི་འདི་ ཆུམ་གྱི་རིགས་མ་འདྲཝ་ཚུ་ བརྔོ་བའི་སྐབས་ སྦོ་ཏེ་སྐྱ་སི་སི་སྦེ་ཡོད་མི་ཅིག་ལུ་སླབ་ཨིན། སྦོ་ཡོ་ཟེར་མི་འདི་ གཞུང་བརྔོ་མཛརཝ་དང་ཕྱདཔ་ད་ སྦོ་ཏེ་ཡོད་ནི་འདི་གིས་ སྦོ་ཡོ་ཟེར་དུས་དང་ཕུ་ལས་ར་ དར་ཏེ་ཡོད་པའི་ཐ་སྙད་ཅིག་ཨིན་ཟེར་ཁ་རྒྱུན་སྦེ་བཤད་ནི་འདུག།

སྦོ་ཡོ་མཛརཝ་འདི་ ལོ་བསྟར་གྱི་ཆོ་གུ་སྐབས་ལུ་དང་ ལོ་གསར་ཉི་ལོག་ཚུ་གི་སྐབས་ལུ་ ཇ་རྩམ་མེད་ཐབས་མེདཔ་ཅིག་ཨིན་པའི་ཁར་ མཛརཝ་ལྷམ་པ་མ་འདྲཝ་ཚུ་ ཚོགས་རྫས་སྦེ་ཡང་སྒྲིག་སྲོལ་ཡོདཔ་ཨིན། མཛརཝ་འདི་ མར་དང་གཅིག་ཁར་སྒྱེས་ཏེ་ མཛརཝ་མར་སྒྱེས་ཟེར་ ཇ་རྩམ་གྱི་ལྷམ་པ་བསྒྲིགས་ཡོད་པའི་གྲས་ལས་ ཇ་རྩམ་རྡིག་ཤོས་ཅིག་སྦེ་རྩིཝ་མ་ཚད་ སྤྱིར་བཏང་ གྲོང་གསེབ་གཡུས་སྒོ་ཚུ་ནང་ མེད་ཐབས་མེདཔ་ཅིག་སྦེ་བརྩིཝ་ཨིན། འདི་ཡང་ ཁྱིམ་ནང་ ནང་གི་ཨ་མའི་ལག་ཤུལ་བདེ་ནིའི་དོན་ལུ་ མཛརཝ་འདི་ དུས་ཨ་རྟགས་ར་ མ་ཆད་པར་བཞག་ཞིནམ་ལས་ ཁྱིམ་ནང་ མགྱོནམོ་དྲག་ཞན་ཆེ་ཆུང་ག་བཟུམ་ཅིག་འོང་རུང་ བསུ་བ་ ཇ་དང་མཛརཝ་ ཡང་ན་ ཆང་གིས་འབདཝ་ཨིན་མས།

སྦོ་ཡོ་མཛརཝ་འདི་ དང་པ་དཀོན་མཆོག་གསུམ་ལུ་ མཆོད་པ་ཕུལ་ནིའི་ཟས་ཅིག་ཨིནམ་མ་ཚད་ དུས་དང་ཕུ་ལས་ར་ གོངམ་བླམ་དང་དཔོན་ཚུ་ མཇལ་བ་འགྱོ་བའི་སྐབས་ ཕྱག་མཇལ་སྦེ་མཛརཝ་དང་ ཆུམ་ཙམ་ཁུག་གང་གང་རེ་ཕུལ་སྲོལ་ཡོད་པའི་ཁར་ རང་གི་གཉེན་ཉེཝ་ཆ་ཁྱབ་ཀྱིས་ལམ་འཇུག་སྦེ་ཡང་ རྐྱབ་་སྲོལ་ཡོདཔ་ཨིན། དེ་མ་ཚད་ རང་གི་གཡུས་ཁར་ ལོ་ཆོག་དང་ གཞན་ཡང་མི་ཤི་གི་སྐབས་ལུ་འབད་བ་ཅིན་ ཆུམ་དང་ཅིག་ཁར་མཛརཝ་བང་ཁྲ་གང་གང་སྐྱེལ་སྲོལ་ཡང་ཡོདཔ་ཨིན། སྤྱིར་བཏང་མང་ཆེ་ཤོས་ཅིག་མཛརཝ་འདི་ རང་གི་ཁྱིམ་ནང་མགྱོནམོ་ ག་བཟུམ་ཅིག་འོངས་ཏེ་འབད་རུང་ ཇ་རྩམ་སྦེ་སྐྱེལ་སྲོལ་རྒྱུན་མ་ཆད་པར་ཡོད་པའི་ཁར་ ལྟོཝ་བཀྱེས་པའི་སྐབས་ ལྟོ་ཁྱད་ཆོདཔ་སྦེེ་ཡང་ ཟ་བའི་སྲོལ་ཡོདཔ་ཨིན།

སྦོ་ཡོ་གི་རིགས་གཅིག་ སྐམ་བརྔོ་མཛརཝ་ཟེར་ཡང་ཡོདཔ་ཨིན་མས་འདི་ཡང་ རེད་བཙོ་ཞིནམ་ལས་ ཁ་རྒྱས་མ་རྒྱས་ཅིག་ལས་ ཆུ་བཙག་བཏང་སྟེ་ ལྷ་ང་ནང་བརྔོཝ་ད་ མེ་ཏོག་རེ་རེ་གཉིས་གཉིས་རྒྱསཔ་ཅིག་བཏོན་ཏེ་ ཐམ་བརྡལ་དགོཔ་ཨིན་མས། དེ་ལས་ བརྡུངས་ཞིན་ན་ ཆུམ་བཏོན་ཏེ་འཕྲང་འཕྲང་ལྷ་ང་ནང་བླུགས་ཏེ་བརྔོཝ་ད་ བཀྱག་སེར་རུ་རུ་འགྱོཝ་ད་ཕབ་དགོཔ་ཨིན་མས། སྦོ་ཡོ་མཛརཝ་འདི་ ཚོས་གཞི་དཀརཔོ་སྦེ་རིང་སུ་ཅིག་སྦེ་ཡོདཔ་དང་ སྐམ་བརྔོ་མཛརཝ་འདི་ ཚོས་གཞི་ གསེར་རུ་རུ་སྦེ་ ཐུང་སུ་ཅིག་སྦེ་འོངམ་ཨིན།
མཛར་བར་མཛར་སྐྱེལ་མེད་རུང་། །ལྟོ་རས་དཀར་ཅུང་ལོག་ཤོག། ཟེར་ དང་ཕུ་གོང་མའི་ཕྱག་མཇལ་དང་། ཕམ་སྤུན་ཆ་ཚུ་ལུ་དག་སྣང་གི་ཁྱོསམ། ལྟ་ལྟོ་ཚང་གི་བར་ན་ བརྩེ་གདུང་ཆ་བཞག་ཚུ་ ཉམས་མ་བཅུག་པར་བཞག་ཐབས་ལུ་ མཛརཝ་འདི་ལྟོ་རས་ནང་བཅིངས་ ཡང་ན་ རྩམ་ཁུག་ནང་འདེགས་ཏེ་ ཕུལ་བའི་སྐབས་ ལོགལེན་གནང་ནི་མེད་པའི་ཁར་ ཧོད་ཡང་གནང་ནི་མིན་འདུག་ཟེར་ གཏམ་དང་དགོད་བྲ་བཟུམ་ཅིག་སྦེ་སླབ་སྲོལ་ཡོདཔ་ཨིན་མས།

མཛརཝ་བརྔོ་ནི་འདི་ དང་ཕུ་ཕམ་ཚུ་གི་སྐབས་ལས་རང་ ལག་ལེན་འཐབ་སྟེ་ ཡོད་པའི་ལམ་སྲོལ་ཅིག་འབདཝ་ལས་བརྟེན་ ལཱ་ཁག་སྦེ་ལྷབ་སྦྱང་འབད་མ་དགོ་པར་རང་བཞིན་གྱིས་སྦྱང་བ་ཚུད་དེ་ རིམ་པ་བཞིན་དུ་ཕ་བརྒྱུད་བུ་བརྒྱུད་སྦེ་ ལག་ལེན་འཐབ་ཡོད་རུང་ ད་རེས་ནངས་པ་ ཨ་ལུ་ཚུ་ཆུང་ཀུ་བསྒང་ལས་ སློབ་གྲྭ་ནང་ལས་ཕར་ཤེས་ཡོན་སྦྱང་སྡོདཔ་ལས་ ལམ་སྲོལ་འདི་ ལྷབ་སྦྱང་འབད་ནི་ལུ་ གདོང་ལེན་འབྱུང་དོ་ཡོདཔ་ཨིན་མས། ཨིན་རུང་ ད་རེས་ནངས་པ་ མཛརཝ་འདི་ དུས་སྟོན་ཚུ་གི་དོན་ལུ་རྐྱངམ་གཅིག་མེན་པར་ ཚོང་འབྲེལ་གྱི་དོན་ལུ་ཡང་ ལག་ལེན་འཐབ་དོ་ཡོདཔ་ལས་ མཛརཝ་བརྔོ་ནིའི་ལམ་སྲོལ་འདི་ དར་ཁྱབ་འགྱོ་སྟེ་ཡོདཔ་ཨིན་མས།

རྒྱུ་ཆས་ཚུ་ཡང་ རབ་བྱུང་པ་ཅིན་ རང་སོའི་གཡུས་སྒོ་ལས་འཐོན་པའི་ཆུམ་ ངངམ་བྱཱ་དང་། རྟ་མགྲིན་ཚེ་རིང་། དེ་ལས་ ད་རེས་ནངས་པ་ རྒྱལ་ཁབ་གོང་འཕེལ་གྱི་འགྱུར་བ་དང་འཁྲིལ་ རྒྱ་ལས་འཐོན་པའི་རྒྱ་ཆུམ་དང་ བཤུར་ཆུམ་ཚུ་ལག་ལེན་འཐབ་ཏེ་ ཚོང་འབྲེལ་འཐབ་ཡོདཔ་ལས་ མཛརཝ་བརྔོ་ནིའི་ ལམ་སྲོལ་འདི་ རྒྱུན་མ་ཆད་པར་ཡོདཔ་ཨིན།

སྦོ་ཡོ་མཛརཝ་བརྔོ་བའི་སྐབས་ དགོས་མཁོའི་ཅ་ཆས་དང་རྫས་སྦྱོར།
- ངངམ་བྱཱ།
- རེ་ལྡེ། ཐམ་བརྡལ་ནིའི་དོན་ལུ་དགོ།
- བྱེམ། བྱེམ་གསིག་མ་ནང་གསིག་སྟེ་ འཇམ་ཅུག་ཅུ་དགོཔ་ཨིན།
- ཟངས་གཞོང་། ཆུམ་སྦང་བཞག་ནིའི་དོན་ལུ་དང་ ཆུ་འཁྱུ་ནིའི་དོན་ལུ་ལག་ལེན་འཐབ་ཨིན།
- གཟན་སྐྱ། ཆུམ་སྦང་བཞག་མི་འདི་ དཀྲུགས་ནིའི་དོན་ལུ་དགོཔ་ཨིན།
- ལག་ཆུང་། ཆུམ་ཆུ་བཙག་ནིའི་དོན་ལུ་དང་ ཆུ་བཤལ་ནིའི་དོན་ལུ་ཨིན།
- ལྷ་ང་། མཛརཝ་བརྔོ་ནིའི་དོན་ལུ་དགོཔ་ཨིན།
- གསེག་གསེམ། ལྷ་ང་ནང་ལུ་ མཛརཝ་དཀྲུགས་ཏེ་ བརྔོ་ནི་གི་དོན་ལུ་དགོཔ་ཨིན།
- ཨམ་པ། ལྷ་ང་བཏབ་སྟེ་ ཕབ་ནིའི་དོན་ལུ་ཨིན།
- སྦ་ཟེ། མཛརཝ་བརྔོ་ཚར་མི་ཚུ་ འདེགས་བཞག་ནིའི་དོན་ལུ་དགོཔ་ཨིན།
- ལྕགས་ཀྱི་གསིག་མ། ལྷ་རྔ་ནང་ལས་ མཛརཝ་གསིག་ཞིན་ན་བཏོན་ནིའི་དོན་ལུ་དགོཔ་ཨིན།

སྦོ་ཡོ་མཛརཝ་བརྔོ་ཐངས།
- རེད་བཙོ་ཞིནམ་ལས་ ཁ་རྒྱས་མ་རྒྱས་ཅིག་ལས་ ཆུ་བཙག་གཏང་དགོ།
- ལྷ་ང་ནང་བརྔོཝ་ད་ མེ་ཏོག་རེ་རེ་གཉིས་གཉིས་རྒྱསཔ་ད་ཕབ་ཞིནམ་ལས་ ཐམ་བརྡལ་དགོ།
- དེ་ལས་ བརྡུངས་ཏེ་ ཆུམ་བཏོན་མི་ལུ་ བཤུར་ཆུམ་ཟེར་སླབ་ཨིན།
- བྱེམ་ ལེགས་ཤོམ་སྦེ་གསིག་སྟེ་ ཕྱེ་མ་བཏོན་དགོ།
- ཚྭ་ནང་ཆུ་བླུགས་ཏེ་ བཀོལ་བཞག་དགོ།
- བྱེམ་ལྷ་ང་ནང་བླུགས་ཏེ་ དྲོད་བཏགསཔ་ད་ ཆུམ་འདི་ལྕག་གཟར་གྱི་དབོགས་ཏེ་ ཚྭ་ཆུ་ནང་སྦང་ཡི་ར་ ལྷ་ང་ནང་བླུགས་ཞིནམ་ལས་ གསེག་གསེམ་གྱིས་དཀྲུགས་ཏེ་བརྔོ་དགོ།
- དེ་ལས་ ལེགས་ཤོམ་སྦེ་སྦོ་སྟེ་ སྐྱ་སི་སི་འགྱོཝ་ད་ གསིག་མ་ནང་གསིགས་ཏེ་ བཏོནམ་ཨིན། དང་ཕུ་ གསིག་མ་མེད་པའི་སྐབས་ལུ་ ལྕགས་ཊིན་དོང་སྤེད་དེ་ ལག་ལེན་འཐབ་ཨིན་མས། ཨིན་རུང་ད་རེས་ནངས་པ་ ལྕགས་ཀྱི་གསིག་མ་འཐོན་ཡོདཔ་ལས་ བྱ་སྟབས་ བདེ་ཏོག་ཏོག་འགྱོ་ཡོདཔ་ཨིན་མས།

ཤེལ་རྔ་སྦྱིས་མེད་རྒེད་འོག་ དགའ་ར་ཁ་ཚོགས་སའི་ མི་བརྒྱུད་འདི་ཡང་ ཝང་ཚོ་ཆེན་བརྒྱད་པའི་ མི་བརྒྱུད་ངོ་མ་ཅིག་ཨིན་མས། ཝང་ཚོ་ཆེན་བརྒྱད་ཚུ་ཡང་ ཅང་། ཀ་ཝང་། དཀར་སྦྱིས། བརཔ། སྟོདཔ། སྦྱིས་མེད། སྨད་ཝང། དེ་ལས་ སྟོད་ཝང་ ཚུ་ལུ་སླབ་ཨིན། ད་ལྟོའི་བར་ན་ཡང་ ཝང་ཚོ་ཆེན་བརྒྱད་ཀྱི་མི་སེར་ཚུ་ ཞབས་དྲུང་རིན་པོ་ཆེ་མཆོག་ལུ་དམག་དཔུང་གི་ཞབས་ཏོག་ཕུལ་བའི་ཚུལ་ལུ་ འབྲུག་སྤུངས་ཐང་བདེ་བ་ཆེན་པའི་ཕོ་བྲང་ནང་ལུ་ ལོ་བསྟར་གནང་སྲོལ་ཡོད་པའི་ མགོན་པོའི་དབང་ཆོག་རྒྱས་པའི་སྒྲུབ་མཆོད་ཆེན་མོ་འདི་ཁར་ དཔའ་མཛངས་པའི་ཆས་བསྒྲིགས་ཏེ་ འགྱོ་སྲོལ་ཡོདཔ་ཨིན་མས།

དུས་དང་ཕུ་འབད་བ་ཅིན་ ཝང་གཞི་འགྱོཝ་ཟེར་ གནམ་དགུན་སྤུངས་ཐང་ཁ་ ཤེལ་རྔ་སྦྱིས་མེད་རྒེད་འོག་དང་ གནམ་དབྱར་ ཐིམ་ཕུ་རྫོག་ཁག་ སྨད་ཝང་རྒེད་འོག་ གནམ་སྲས་གླིང་ལུ་སྡོདཔ་ཨིན་མས། ཨིན་རུང་ ད་རེས་ནངས་པར་ ལམ་སྲོལ་འདི་ རྒྱུན་ཆད་ཡོད་མི་འདི་ཡང་ རྒྱལ་ཁབ་ཀྱི་སྲིད་བྱུས་ལམ་ལུགས་དང་ ས་གནས་ཀྱི་བཅད་མཚམས་ལས་བརྟེན་ ཁྱིམ་གཅིག་ནང་གི་ ནང་མི་བཟའ་ཚང་ཚུ་ལུ་ ས་གཞི་ཚུ་ སྐལཝ་བགོ་བཤའ་སྦེ་སྤྲོད་དེ་ ལ་ལུ་ཅིག་ སྤུ་ན་ཁ་ཤེལ་རྔ་སྦྱིས་མེད་རྒེད་འོག་དང་ ལ་ལུ་ཐིམ་ཕུ་གནམ་སྲས་གླིང་ལུ་སྦེ་ སོ་སོ་སྡོད་ཡོདཔ་ཨིན་རུང་ ད་ལྟོའི་བར་ན་ཡང་ དཀོན་མཆོག་མཆོདཔ་ཟེར་ ལོ་རེའི་བར་ན་ཚར་རེ་ སྙན་དར་ཕུལ་ནི་དང་ ཕམ་བུ་གཞིའི་བརྩེ་གདུང་དང་ཆ་བཞག་ཚུ་ བརྩི་ནིའི་སྔར་སྲོལ་བཟང་པོ་འདི་ མ་ཉམས་པར་ཡོདཔ་ཨིན་མས།
མཛརཝ་བརྔོ་ནིའི་ལུགས་སྲོལ་འདི་ དུས་དེམ་ཅིག་ཁར་ མི་ངོམ་འདི་གིས་ཁྱབ་སྤེལ་བཏང་ཡོདཔ་ཨིན་ཟེར་བའི་ལོ་རྒྱུས་ཚུ་ ངག་ཐོག་དང་ཡིག་ཐོག་ལུ བྲིས་བཞག་བཞགཔ་ཅིག་མེད་དེ་འབད་རུང་ ཕ་བརྒྱུད་བུ་བརྒྱུད་སྦེ་ དར་ཁྱབ་འགྱོ་ཡོད་མི་འདི་ མ་ཉམས་པར་བཞག་ཡོད་པའི་དངོས་མེད་ལམ་སྲོལ་གྱི་རིགས་ཅིག་ཨིན་པའི་བརྩི་ཁུངས་བསྐྱེད་དེ་ཡོདཔ་ཨིན།

ཞིབ་འཚོལ་འབད་མི། ལྷམ་ཅུ། སྒྲིག་སློབ་གཙོ་འཛིན་འོགམ།